Telegram i Papës për atentatet e fundit në Irak: ‘Sulmet kundër të krishterëve i prekin të gjithë irakianët’.

(11.01.2008 RV) “Sulmet kundër të krishterëve drejtohen kundër mbarë popullit irakian”. Kështu shkruhet në një telegram drejtuar nga Benedikti XVI, me nënshkrimin e sekretarit të Shtetit, kardinalit Bertone, Patrikut kalde të Bagdadit, kardinalit Deli. Papa i shpreh afërsinë njerëzore e shpirtërore gjithë bashkësisë së krishterë, pas atentateve që e goditën në Bagdad, Mosul e Kirkuk dhe kërkon bisedime paqësore për kapërcimin e vështirësive në vend. U drejtohet drejtpërdrejtë përgjegjësve, duke u kërkuar të heqin dorë nga dhuna, që po i shkakton vuajtje të rënda popullsisë civile dhe inkurajon autoritetet të vijojnë përpjekjet për të gjetur rrugëzgjidhje të arsyeshme, që i respektojnë të gjithë. Së fundi, Benedikti XVI thekson se lutet për bashkëjetesën paqësore të të gjitha grupeve të ndryshme të cilat përbëjnë popullsinë irakiane.