Hilari Klinton mund Barak Obamën në Nju Hempshajër
(09.01.2008 RV)Ndërsa presidenti
amerikan Xhorxh Bush filloi sot vizitën e tij në Lindjen e Mesme, në SHBA vazhdon
gara ndërmjet kandidatëve të rinj për president. Në votimet paraprake që do të zgjedhin
dy kandidatët, të cilët do të përballen në zgjedhjet e nëntorit të këtij viti, ka
fituar deri tani demokrati Barak Obama, por në Nju Hempshajër, Hilari Klinton arriti
të fitojë me dy pikë më tepër se rivali i saj brenda partisë. Ndër republikanët, afirmohet
Xhon Mek Kein. Senatori i Arizonës mundi si manjatin mormon Mit Rumni, ashtu edhe
pastorin baptist Hakëbi, që pati triumfuar në Ajoua. Për të pasur një ide më të qartë
se cilët do të jenë kandidatët për Shtëpinë e Bardhë duhet pritur 5 shkurti, ditë
në të cilën do të bëhen votime në mëse 20 shtete amerikane. Por cilat janë temat themelore
që me siguri do të karakterizojnë fushatën elektorale të demokratëve e të republikanëve?
Të dëgjojmë opinionin e Masimo Teodorit, profesor i historisë amerikane në Universitetin
e Peruxhas në Itali: Çështja e luftës në Irak e, më në përgjithësi, e luftës
kundër terrorizmit ka qenë gjithnjë e më pak e rëndësishme në muajt e fundit. Temat
mbi të cilat do të luhen zgjedhjet janë: së pari, problemi i taksave, pra nëse do
të konfirmohet apo jo ulja e taksave kryer nga administrata Bush; pastaj është problemi
i emigracionit, duke pasur parasysh se ka rreth 10 milion emigrantë të paligjshëm,
që vijnë sidomos nga Amerika Qendrore dhe Meksika, për të cilët opinionet e demokratëve
dhe të republikanëve janë shumë të ndryshme. Kjo pikë është e rëndësishme edhe për
të kuptuar se si do të orientohen të ashtuquajturit “latinos”, amerikanët me origjinë
latino-amerikane, që sot, me një total prej 45-50 milionësh, përbëjnë pakicën më të
rëndësishme, vendimtare për zgjedhjet presidenciale në shtetet e Jugperëndimit. Së
fundi, më duket se situata ekonomike bëhet gjithnjë e më e vështirë, prandaj propozimet
dhe zgjidhjet që do të jepen për këtë argument do ta influencojnë shumë votën.