(06.01.2008 RV) Sot, në festën e Dëftimit
të Zotit, u përkujtuan edhe Shën Karli i Seces, rregulltar françeskan e Shën Rafaela,
virgjër, themeluese e Motrave të Zemrës së Krishtit.
Ashtu siç kumtonte profeti,
edhe njerëzit që jetojnë përtej deteve, tani mund ta shikojnë dritën e madhe, Jezusin.
Të bashkëpunojmë të gjithë që kjo dritë të ndriçojë mbarë njerëzimin. Këtë na kujtojnë,
me liturgjinë e festës së tyre,Shën Raimondi Penjafort, meshtar dominikan,
bashkëthemelues i Mercedarëve, Shën Luçiani, meshtar e Shën Polieuti martir, që do
të kremtohen të hënën.
Të martën e ardhshme
do të përkujtohen Shenjtorët Severini, abat apostull i Norikut e Lorenc Justiniani,
patrik Venedikut, që na nxisin të reflektojmë se jeta e vërtetë nuk vjen nga buka
e përditshme, për të cilën megjithatë kemi nevojë, por nga Zoti. Ai na do e, i prekur
nga lutjet tona, na siguron bukën e jetës së pasosur. Nuk është fantazmë, Ai
që ecën mbi ujërat e detit në Betsaide. Në se nuk i gurëzojmë zemrat, do të shohim
se Zoti kryen edhe për ne vepra të mrekullueshme. Këtë na kujtojnë, të mërkurën,
Shën Juliani, shën Anton Fatati, ipeshkëv i Ankonës dhe Shën Andreu Korsini, karmelitan,
ipeshkëv i Fiezoles.
Të enjten ështëfesta e tre papëve shenjtorë:
Agatonit, Gregorit X e Melkiadhit, që na kujtojnë se të kumtosh fjalën e Zotit do
të thotë të shpallësh lirinë e plotë të njerëzimit.
Duke ndjekur liturgjinë
e festës së Shën Igjinit papë, Shën Pjetrit të Çezaresë, martir e të Shën Paolinit
të Akuilesë, ipeshkëv, që do të përkujtohen të premten e ardhshme, nuk mund
të mos meditojmë se Zoti ka pushtet të shërojë deri njerëzit e gjymtë e të mbuluar
nga plagët e gërbulës. Ai pret nga ne vetëm lutjen për mëshirë.
Java mbyllet,
të shtunën e ardhshme, me festën e Shën Arkadit, martir e Shën Anton Maria Pucit,
meshtar. Na kujtojnë se përmes ujit të pagëzimit çdo njeri bëhet anëtar i popullit
të Krishtit.