Papa në Meshën e solemnitetit të Dëftimit të Zotit: Kisha dëshiron t’i shërbejë njerëzimit.
(06.01.2008 RV)Në solemnitetin
e Dëftimit të Zotit, Benedikti XVI kryesoi sot paradite Eukaristinë në Bazilikën e
Vatikanit, për të kremtuar Krishtin, dritë e botës, që u dëftohet popujve. Arritja
e Mbretërve Dijetarë nga Lindja në Betlehem për të adhuruar Mesinë e posalindur –
pohoi Benedikti XVI – është shenjë që tregon se Mbreti universal u dëftohet popujve
dhe gjithë njerëzve, që kërkojnë të vërtetën. Është fillimi i një lëvizjeje të kundërt
me episodin biblik të Kullës së Babelit, simbol i pështjellimit të gjuhëve e i shkapërderdhjes
së njerëzmit në mbarë tokën: “Nga pështjellimi - tek mirëkuptimi, nga përçarja
- tek pajtimi. Dallojmë lidhjen ndërmjet Dëftimit të Zotit e Rrëshajëve: në se ditëlindja
e Krishtit, Kokës, është edhe ditëlindja e Kishës, Korpit të tij, në Mbretërit Dijetarë
shikojmë popujt që bashkohen me tepricat e Izraelit, duke paralajmëruar shenjën e
madhe të Kishës shumëgjuhëshe, të realizuar nga Shpirti Shenjt pesëdhjetë ditë pas
Pashkëve”. Është gjithnjë mahnitëse – tha në vijim Papa – t’i hedhësh një
vështrim historisë së shëlbimit në të gjithë shtrirjen e saj, ndërmjet Dëftimit të
Zotit e Rrëshajëve, për të admiruar bukurinë e planit të Hyjit, projektin në historinë
e qenies së Tij ‘Bashkim trinitar’. Dashuri besnike e ngulmuese, që nuk heq dorë kurrë
nga besëlidhja, nga breznia në brezni. Ky mister – shpjegoi Papa – është shpresa e
historisë, është misteri i një bekimi, i cili dëshiron të arrijë tek të gjithë popujt,
tek gjithë njerëzimi, që të gjithë të jetojnë si vëllezër e motra, si bij të të njëjtit
Atë. Një plan i tillë, i paralajmëruar nga profetët – pohoi Papa - u dëftua në Jezu
Krishtin e tani vijon të realizohet përmes Kishës: “Por ai kundërshtohet nga
përçarjet e dhuna, që e trondisin njerëzimin për shkak të mëkatit e të konfliktit
ndërmjet atyre që e duan gjithçka për vete. Kisha është në shërbim të ‘misterit’ të
bekimit për mbarë njerëzimin. Ajo e kryen plotësisht misionin e saj, vetëm kur pasqyron
në vetvete dritën e Krishtit Zot, e kështu i ndihmon popujt e botës të ecin në rrugën
e paqes e të progresit të vërtetë”. Gjatë homelisë, Benedikti XVI kujtoi edhe
se Kisha, së cilës iu besua ruajtja e bekimit me thirrjen e Abrahamit, është e shenjtë,
por e përbërë nga mëkatarë, e përshkuar nga tensionet ndërmjet asaj që është bërë
e asaj që s’ është bërë akoma. Në vijim Papa foli edhe për tensionet që trondisin
botën. Edhe sot – tha Benedikti XVI duke përsëritur fjalët e Izaisë profet – kombet
i mbulon një errësirë e madhe: “Nuk mund të thuhet se globalizimi është sinonim
i rendit botëror, përkundrazi. Konfliktet për epërsinë ekonomike dhe akaparimi i burimeve
energjitike, hidrike e i lëndëve të para, e vështirësojnë shumë punën e të gjithë
atyre që përpiqen të ndërtojnë një botë të drejtë e solidare”. Ndjehet nevoja
për një shpresë më të madhe, që krijon kushtet për të pëlqyer të mirën e përbashkët,
në vend të luksit të pakicës e mjerimit të shumicës: “Kjo shpresë e madhe mund
të jetë vetëm Hyji… jo çfardolloj hyji, por ai Hy që ka fytyrë njerëzore (n. 31):
Hyji që u dëftua në Foshnjën e Betlehemit e në të Kryqëzuarin - e Ngjallur”. Kur
mungon shpresa e vërtetë – nënvizoi Ati i Shenjtë - lumturia kërkohet në dehje, në
pangopësi, në teprime, e kështu njeriu rrënon vetveten e botën. Atëherë mund të themi
se vetpërmbajtja nuk është thjeshtë rregull asketik, por rrugë për shpëtimin e njerëzimit: “Është
e qartë, tashmë, se vetëm duke zgjedhur stilin e një jete të thjeshtë, të shoqëruar
nga impenjimi serioz për shpërndarjen e barabartë të pasurive, do të jetë e mundur
të vendoset rendi i zhvillimit të drejtë e të qëndrueshëm. Prandaj ndjehet nevoja
për njerëz që ushqejnë shumë shpresa e kanë shumë guxim”. Guximi i Mbretërve
Dijetarë – nënvizoi Ati i Shenjtë – që morën një rrugë të gjatë duke ndjekur një yll
e që ditën të gjunjëzohen para një Foshnjeje për t’i paraqitur dhuratat e tyre të
çmuara. Kemi nevojë të gjithë për këtë guxim e për këtë shpresë, që nuk të gënjen.