Leoni i Madh: ‘Mbretërit dijetarë janë frytet e para të thirrjes sonë”.
(06.01.2008 RV) Në mbretërit që adhurojnë Krishtin, njohim frytet e para të
thirrjes sonë e të fesë sonë dhe me shpirtin e mbushur plot gëzim, kremtojmë fillimin
e shpresës së lume. Nga kjo pikë kemi nisur të hyjmë në trashëgiminë e amshuar: nga
kjo pikë na janë hapur horizontet e Shkrimit Shenjt që flet për Krishtin dhe për
të vërtetën. E përhapi dritën ndërmjet gjithë njerëzve. Qoftë nderuar, prandaj, nga
ne, kjo ditë e shenjtnueshme, në të cilën u duk Autori i shpëtimit tonë: është Ai,
që Mbretërit e nderojnë ferishte në djep, në sa ne e adhurojmë të gjithpushtetshëm
në qiell. E sikurse ata ndër peshtafet e tyre do t'i paraqitnin Zotit dhurata mistike,
ashtu edhe ne, në zemrat tona, do t’i paraqesim çka është më e denjë për Zotin. Ndonëse
ai është dhurues i të gjitha të mirave, gjithsesi kërkon një fryt sado të vogël nga
vullneti ynë i mirë: Mbretëria e qiellit nuk është bërë për atë që fle, por për atë
që rri zgjuar, që djersin e që jeton sipas ligjit të Zotit. Kështu, në se ne nuk do
t'i bëjmë të padobishme dhuratat e tij, do të meritojmë atë që na është dhuruar e
do të marrin atë që na është premtuar. Bijtë e dritës duhet t'i flakin veprat e errësirës.
Largohuni, prandaj, nga urrejtja, flakeni tutje gënjeshtrën, shkatërrojeni mburrjen
me përvujtërinë, mos e pranoni kopracinë, duajeni bujarinë: është e drejtë që gjymtyrët
të drejtohen prej kokës së tyre. Në këtë mënyrë do të jemi të denjë të marrim pjesë
në lumturitë e premtuara.