Vijon suksesi ndërkombëtar i librit të Benediktit XVI “Jezusi i Nazaretit”.
(03.01.2008 RV)Tetë muaj pas botimit,
Libri i Papës “Jezusi i Nazaretit” ka arritur në më se 2 milion kopje e gjatë vitit
2007 është shpërndarë në 50 vende të ndryshme, nga Shqipëria në Brazil, nga Japonia
në Zelandën e Re, nga Egjipti në Indonezi. E kjo, sepse njerëzit kanë gjithnjë
më shumë etje ta njohin Jezusin. Jezusi i Ungjijve, siç paraqitet nga Papa në librin
e tij, përkon me Jezusin real, Jezusin historik në kuptimin e plotë të kësaj fjale.
Shumë e kanë studiuar figurën e Krishtit të kryqëzuar e të gjithëve Jezusi vijon t’u
bëjë pyetjen: “Kush thoni se jam unë? E përgjigjet janë të shumta: “Edhe sot
është kështu: shumë i afrohen Jezusit, si të themi, nga jashtë, Studiues të mëdhenj
ia njohin madhështinë shpirtërore e morale e ndikimin mbi historinë e njerëzimit,
duke e krahasuar me Budën, Konfucin, Sokratin e dijetarë apo figura të tjera të mëdha
të historisë. Por nuk arrijnë të kuptojnë se ai është unik… Si asokohe, ashtu edhe
sot, njerëzit kanë opinione të ndryshme për Jezusin. E si atëherë, edhe ne, dishepujve
të sotëm, Jezusi na përsërit pyetjen: “E ju, kush thoni se kam unë?”. Dëshirojmë të
bëjmë tonën përgjigjen e Pjetrit: “Ti je Krishti, Biri i Hyjit të gjallë” (Homeli
e mbajtur më 29. 06. 2007) Në librin e tij Papa pohon se Jezusi i ka
bërë të bien poshtë të gjitha kategoritë e interpretimit e se vetëm duke u nisur nga
misteri i Krishtit Hyj i vërtetë e njeri i vërtetë, mund të kuptohet vërtetë figura
e Jezusit. Por, ta njohësh Jezusin – ripohon Ati i Shenjtë - nuk do të thotë të njohësh
thjeshtë një teori; do të thotë të takosh konkretisht një Vetje të gjallë. Është përvojë
që i jep jetës gëzimin e vërtetë, ashtu siç u tha të rinjve të Pavisë më 22 prillin
e kaluar: ”Të dashur të rinj e të reja, ju uroj ta zbuloni gjithnjë më shumë
gëzimin që buron nga ecja në gjurmët e Krishtit dhe nga lidhja e miqësisë me Të. Është
gëzimi i Pjetrit dhe i Apostujve të tjerë, i Shenjtorëve e i Shenjtoreve të të gjitha
kohërave. Ky gëzim më ka shtyrë edhe mua të shkruaj librin ‘Jezusi i Nazaretit’, që
sapo është botuar. Për më të rinjtë është shumë impenjativ, por simbolikisht po jua
dorëzoj juve, që të shoqërojë rrugën e fesë të breznive të reja”. Papa na
kujton se nuk mjafton të deklarosh se je mik i Jezusit: “Miqësia e vërtetë me
Jezusin shprehet në mënyrën e jetesës: shprehet me mirësinë e zemrës, me përvujtërinë,
me butësinë e mëshirën, me dashurinë për drejtësinë e për të vërtetën, me impenjimin
e sinqertë e të ndershëm për paqen e pajtimin. Kjo, mund të themi, është karta e identitetit,
që tregon se jemi miqtë e Tij të vërtetë; kjo është ‘pasaporta’, që na krijon mundësitë
të hyjmë në jetën e pasosur”.(Lutja e Engjëllit të Tënzot më 26. 08. 2007).