Vdekja e Atë Fishtës në kujtimet e Atë Paulin Margjokajt ofm
(30.12.2007 RV)Po e kujtojmë Atë Fishtën në 67 vjetorin e vdekjes, tue shfletue
edhe disa "Dromca historie" nga Ditaret e panjoftuna të Doktor-Profesor Atë Paulin
Margjokajt O.F.M., dishmitár pamor i funeralit ma madhështor që ka pá ndonjë herë
Shqipnia. E hane, 30 dhetuer 1940 Sot nade ora 1. 15 mbas mjesnatet
diq në spitalin e Shtetit në Shkodër, P. Gjergj Fishta. Pat shkue në Troshan kinse
po largohet per pak kohë prej poteres së gjytetit, por aty u lig keqas e kje kah des
prej zemret, aq sa edhe e vojuen. E prûnë meiherë në Shkoder e e shtruen në spital,
ku filloi me u bâ ma mirë. Një ditë të dielle, me 22, ndërsá po i shijshin oden, del
në dritore a aty merr nji të therun në mushkninë e djathtë. Filloi polmonita. Luogotenenca
dërgoi primarin e Tiranës me e vizitue. E pruni randë. Sot qi diq, ndodhi në Shkoder
Z. Ernest Koliqi, Ministër i Arsimit, qi urdhnoi me i mbyllë të gjitha shkollat e
gjytetit e me e vû flamujt gjysë-shtizë. Në orën 4 mbasdite u bart trupi i tij prej
spitalit, në kishë t'onë. U bart ndër duer e tanë mësyjshin me e kapë arkivolin e
tij. Deri prefekti e barti, e mandej auktoritetet tjera, shkollarët, seminaristat…Koliqi
u nis për Tiranë. Në Meshën qi u tha, kjenë Luogotenenti, Kryeministri Verlaci,
Ministri i Mbrendshëm Bushati, Koliqi, Meloni, auktoritete fetare e civile e ushtarake
si dhe popull i shumtë. Mbajti fjalimin Imzot Thaçi, i cili edhe tha Meshën e Madhe,
qi u regjistrue ndër disq fund e maje. Komiteti bashkijak caktoi me bâ mbasdite nji
sjellje të madhnueshme nëpër qytet, tue fillue nga Rruga Viktor Emmanueli II, në rrugën
Gjeçov, në Skanderbeg e Katedrale, ku u bâ salikimi prej Mons. Prennushit e mandej
trupi u kthye nëpër rrugën Konti Çiano, Viktor Emmanueli IV e Kisha françeskane.
Para postet u bânë 5 fjalime: Kryetari i bashkisë, Mark Kakarriqi, prefekti Riza Dani,
Hafiz Kastrati, Aleks Xhuvani, Nush Topalli. Ministri Koliqi e ndoq arkivolin gjithkund
tue kjá prej përmallimit.U vorrue në fund të Kishës.