2007-ta e Benediktit XVI: Papa i tregon njerëzimit shpresën e sigurtë në Krishtin,
që fiton mbi të keqen e historisë.
(28.12.2007 RV)Një vit të cilin
e ndriçoi dhe e udhëhoqi Shpresa ungjillore: mund të përmblidhet kështu viti 2007
i Benediktit XVI, i cili gjatë këtyre dymbëdhjetë muajve i ofroi besimtarëve Enciklikën
e tij të dytë dhe librin mbi ‘Jezusin e Nazaretit’. Ishte vit i shtegtimeve apostolike
në Brazil e në Austri, i Letrës drejtuar katolikëve kinezë, i Nxitjes Sacramentum
Caritatis dhe i përtëritjes së dialogut ekumenik me botën e krishterë e ndëfetar me
botën myslimane. Të rikujtojmë disa nga çastet më të rëndësishme që kaloi, gjatë vitit
2007, Benedikti XVI, Papa i shpresës. ‘Spe salvi’ (Me shpresën shpëtuam).
Enciklika kushtuar Shpresës publikohet në përfundim të vitit 2007, por për Papën gjithë
viti që po përfundon u përshkua nga Shpresa ungjillore. Çdo gjest i magjisterit të
tij është ftesë për të shpresuar në Tënzonë, në dashurinë e tij. Më 8 janar Papa
takohet me Trupin Diplomatik për urimet tradicionale të vitit të ri. Fjalimi i tij
drejtuar ambasadorëve është një vështrim mbi Planetin dhe një thirrje e fuqishme për
kapërcimin e krizave politike shoqërore e humanitare. Benedikti XVI u kërkon ambasadorëve
të Trupit Diplomatik pranë Selisë së Shenjtë, të mos i harrojnë vështirësitë, nganjëherë
dramatike, që kalon njerëzimi i uritur në korp e në shpirt, e sidomos Afrikën: “Il
s’agit d’un défi qui consiste à prouvoir et à consolider… Papa i nxit përfaqësuesit
e shteteve të punojnë për konsolidimin e çdo gjëje pozitive në botë, duke kapërcyer,
kështu, me urti e këmbëngulje, gjithçka e zvetënon dhe e vret njeriun. Për Ballkanin
uron jo vetëm stabilitet politik, por edhe statusin për Kosovën dhe integrimin në
strukturat e Bashkimit Evropian. Prekëse vizitanë burgun romak të
të miturve të Kazal Marmos, më 18 mars. Po në këtë ditë, në lutjen e Engjëllit të
Tënzot, Benedikti XVI ndalohet tek Eukaristia “burim i gëzimit të krishterë” dhe vë
theksin mbi lidhjen ndërmjet Enciklikës së tij “Deus Caritas est” e Nxitjes
pas-sinodale “Sacramentum Caritatis”, botuar më 22 shkurt: “Ja pse zgjodha
si titull ‘Sacramentum caritatis’, duke përsëritur përkufizimin e bukur të Shën Tomës
së Akuinit, që e quajti Eukaristinë “Sakrament i dashurisë”. Po, në Eukaristi Krishti
desh të na dhurojë dashurinë e vet, e cila e shtyu të flijojë jetën në Kryq për ne.
Në Darkën e Mbrame, duke larë këmbët e nxënësve të vet, Jezusi na la urdhërimin e
dashurisë: “Ashtu si ju kam dashur unë, ashtu duajeni edhe ju njëri-tjetrin!”. Më
13 prill paraqitet libri i Papës ‘Jezusi i Nazaretit’. Në parathënien e Librit, Benedikti
XVI shpjegon se është fryt i një shtegtimi të gjatë shpirtëror. Në pak ditë vëllimi
bëhet best seller në mbarë botën. Më 16 prill Ati i Shenjtë feston 80-vjetorin. Një
ditë më parë, në Meshën për ditëlindjen e tij në Sheshin e Shën Pjetrit, i falënderon
besimtarët që e shoqërojnë në shërbimin e tij me dashuri bijnore: “Vazhdimisht
shikoj me gëzim plot mirënjohje sa e madhe është radha e atyre që më mbështesin me
lutje; atyre që, me fenë e dashurinë e tyre më ndihmojnë ta kryej shërbimin tim,
që më falin për ligështitë e mia, duke parë edhe në hijen e Pjetrit, dritën mirëbërëse
të Jezu Krishtit. Prandaj në këtë orë dëshiroj të falënderoj me gjithë zemër Zotin
e ju të gjithë”. Një javë më pas, më 21 e 22 prill, është në Vigjevano të Pavisë,
për vizitë baritore nën shenjën e Shën Agostinit, model gjithnjë aktual për popullin
e Zotit, Shenjt që i nxit të gjithë të shpresojnë në dashurinë e Jezusit: “Në
shkollën e Shën Agostinit përsëris këtë të vërtetë si Ipeshkëv i Romës, ndërsa, me
gëzim gjithnjë të ri, e pranoj me ju, si i krishterë. T’i shërbesh Krishtit është
sidomos çështje dashurie!”. Muaji maj karakterizohet nga shtegtimi IV apostolik
ndërkombëtar i Benediktit XVI, i cili shkeli për herë të parë në Amerikën Latine.
Papa viziton Brazilin nga 9 deri më 14 maj të vitit 2007, për Konferencën V të përgjithshme
të Episkopatit Latinoamerikan e të Karaibeve, mbledhur në qytetin marian të Aparesidës.
Vizita e Papës i jep një nxitje të re misionare Kishës së Kontinentit. Një nga çastet
më prekëse në Tokën braziliane janë ato që Papa i jeton në Fazenda da Esperança, një
bashkësi fëmijësh të droguar, që i rikthehen në jetë, falë shpresës ungjillore: “Në
Fazenda da Esperança – thekson Papa – kufijtë e botës kapërcehen e shikimi
lartohet drejt Hyjit. Krishti i ngjallur mjekon plagët e i shpëton bijtë e bijat e
Hyjit, e shpëton njerëzimin nga vdekja, nga mëkati e nga skllavëria e pasioneve.
Ngjallja e Krishtit bashkon qiell e tokë”. Më 17 qershor Benedikti XVI është
në Asizi me rastin e 800-vjetorit të kthimit të Shën Françeskut në rrugën e Zotit.
Vera e 2007-tës është stinë e botimit të dokumenteve papnore me rëndësi të madhe:
më 22 qershor Benedikti XVI përcakton, me një ‘Motu Proprio,’ se për të zgjedhur
papën, do të jetë gjithnjë e nevojshme një shumicë e përbërë nga 2/3 e votuesve. Më
30 të të njëjtit muaj, një ngjarje me rëndësi historike: botimi i Letrës së Benediktit
XVI drejtuar katolikëve kinezë. Duke i folur Kuries Romake më 21 dhjetorin e kaluar,
Ati i Shenjtë shpreh besimin se kjo Letër do të hapë një stinë të re në marrëdhëniet
ndërmjet Romës e Pekinit: “Letra u prit me gëzim e mirënjohje nga katolikët
në Kinë. Uroj që, me ndihmë të Zotit, të prodhojë frytet e shpresuara”. Korriku
2007 hapet me publikimin Motu Proprio ‘Summorum Pontificum’, mbi përdorimin
e liturgjisë romake të parareformës të vitit 1970, që hyri në fuqi më 14 shtatorin
e kaluar, në Festën e Naltimit të Shëna Kryqit. ‘Motu Proprio’ e Papës shoqërohet
me një letër sqaruese. Rishikimi i së kaluarës, i përçarjeve që copëzuan Korpin e
Krishtit - shkruan Papa në këtë Letër - më shtyu t’i bëj të gjitha përpjekjet për
t’u krijuar mundësitë ta gjejnë përsëri unitetin, atyre që kanë dëshirë të jenë të
bashkuar. Më 20 korrik publikohet Mesazhi për Ditën XXIII Botërore të Rinisë,
Sidnei 2008 me temë: “Por ju do të merrni fuqinë e Shpirtit Shenjt, i cili do të
zbresë në ju dhe ju do të bëheni dëshmitarët e mi” (Vap.1, 8). E tek tema kryesore
e ngjarjes së madhe rinore ndalet kryesisht Papa në Mesazh, duke u drejtuar të rinjve
ftesën: “Shkoni kundër rrymës: mos i dëgjoni zërat të cilat, nga të katër anët,
propagandojnë modele jete që kanë vulën e arrogancës e të dhunës, të prepotencës e
të suksesit me çdo kusht, të përpjekjes për t’u dukur e për të pasur e jo për të qenë.
Të jeni gati për të vënë në lojë edhe jetën tuaj, që të ndriçoni botën me të vërtetën
e Krishtit” Nga 7 deri më 9 shtator Papa është në Austri për udhëtimin e tij
VII apostolik ndërkombëtar. Një vizitë që arriti kulmin me shtegtimin në shenjtëroren
mariane të Mariacelit. “Të udhëhequr e të inkurajuar nga Maria – thotë Papa – duam
ta bëjmë sa më të mprehtë vështrimin tonë të krishterë”. Vulën e shpresës, ndonëse
pa i fshehur vështirësitë, kanë fjalët e Papës mbi temat kyçe të ekumenizmit e të
marrëdhënieve me myslimanët. Letra drejtuar Asamblesë Ekumenike të Sibiut dhe përgjigja
138 intelektualëve myslimanë, ripohojnë kujdesin e Benediktit XVI për të promovuar
dialogun e bazuar mbi Vërtetësinë dhe Dashurinë. Më 21 tetor, në Napoli, në takimin
ndërfetar organizuar nga Bashkësia e Shën Egjidit, Ati i Shenjtë thekson se “fetë
mund e duhet të ofrojnë burime të çmuara për ndërtimin e njerëzimit paqësor, sepse
i flasin për paqe zemrës së njeriut”: “Përballë një bote të dërmuar nga konfliktet,
atje ku nganjëherë përligjet dhuna në emër të Hyjit, është e rëndësishme të ripohohet
se fetë nuk duhet të bëhen kurrë përçuese të urrejtjes; nuk mund të arrihet kurrë
në përligjjen e së keqes e të dhunës, duke thirrur emrin e Zotit”. Më 24 nëntor
mbahet Koncistori i Benedikti XVI për krijimin e 23 kardinajve të rinj, nga të cilët
18 me të drejtë zgjedhore. Të ardhur nga zona të ndryshme gjeografike të tokës - nënvizon
Papa - Kardinajtë shprehin universalitetin e katolicitetin e Kishës. Gjatë vitit 2007,
përveç krijimit të kardinajve të rinj, janë të shumta emërimet domethënëse në Vatikan
e në dioqeza. Ndërmjet tyre kujtojmë atë të profesor Giovanni Maria Vian në drejtim
të ‘L’Osservatore Romano’ dhe të biblistit Gjanfranko Ravazi, në krye të dikasterit
për kulturën. Javët e fundit të vitit ndriçohen nga ‘Spe salvi’, dhuratë që Papa
ua bëri të gjithë të krishterëve dhe njerëzve vullnetmirë për Krishtlindje. Enciklika
e dytë e Benediktit XVI, botuar më 30 nëntor, është edhe ajo një sukses editorial,
njëlloj si “Deus caritas est”. Ja si e shpjegon Papa Racinger unicitetin e shpresës
së krishterë në lutjen e Engjëllit të Tënzot të së Dielës së parë të Kohës së Ardhjes,
më 2 dhjetor: “Njeriun e shpëton dashuria, që e bën të mirë e të bukur jetën
personale e shoqërore. Prandaj shpresa e madhe, e plota e përfundimtarja, sigurohet
nga Hyji që në Jezusin na vizitoi e na dha jetë e në Të do të kthehet në mbarim të
kohëve. Në Krishtin shpresojmë, Atë presim!”. Shpesë shëlbuese të cilën të
gjithë kanë të drejtë ta njohin. Këtu qëndron rëndësia e propozimeve të Notës doktrinore
mbi disa aspekte të ungjillëzimit, publikuar më 14 dhjetor nga Kongregata për Dokrinën
e Fesë. Dokumenti ka për qëllim t’u kujtojë gjithë të krishterëve – në një situatë
në të cilën shpesh deri shumë besimtarë nuk e kanë të qartë domosdoshmërinë e ungjillëzimit
– se pranimi i Lajmit të Mirë të fesë, na shtyn vetvetiu ta komunikojmë shëlbimin
që e morëm dhuratë. Zemrës së njeriut që shpreson në paqen, Papa i drejton mesazhin
për Ditën e 41-të Botërore të Paqes, botuar më 11 dhjetor. Benedikti XVI kujton vlerën
e familjes, si agjensi e vërtetë e paqes dhe fton çdo burrë e çdo grua të fitojë vetëdijen
se i përket së njëjtës familje njerëzore e se prandaj, duhet të impenjohet për sigurimin
e paqes së vërtetë e të qëndrueshme për të gjithë”. Në mesazhin ‘Urbi et Orbi’ – ‘Romës
e Botës’ Papa kujton zonat e botës ku nuk ka paqe, duke u ndaluar posaçërisht në
Ballkan.