19 снежня 2007 года а 15.30 у кляштары Сясцёр Кармэлітанак Дзіцятка Езус у Гудагаі
ва ўзросце 77 гадоў адышла да Пана сястра Юзэфа Ждановіч, кляўзуровая дамініканка. Святой
памяці сястра Юзэфа была родам з-пад Ашмянаў. У ордэн дамініканак паступіла ўжо пасля
ліквідацыі кляштара ў Вільні, калі сёстры разышліся ў розныя парафіі, каб перажыць
час пераследу і дапамагаць святарам. У складаны перыяд месцам яе манаскай фармацыі,
а пазней месцам пастаяннага жыхарства і апостальства стала м. Гудагай. Разам з с.
Сабінай яна жыла ў невялічкай хатцы побач з касцёлам: укрыта, не носячы габіту, у
пакоры ўсё сваё жыццё аддала малітве і працы ў парафіі. Калі ў 1990 годзе кармэліты
босыя вярнуліся ў санктуарый, сястра Юзэфа клапацілася пра айцоў і братоў, як маці:
служыла парадай, прымала кожнага з усмешкай і любоўю, рыхтавала есці, прала, даглядала
агарод, але перадусім малілася – верна і вельмі шмат. Пасля адновы супольнага
жыцця ў Вільні, па розных прычынах яна засталася адна ў Гудагаі, радуючыся блізкасці
славутага ласкамі абраза Маці Божай. Калі пагоршыўся стан яе здароўя, ахвяравала Богу
праз Марыю свае пакуты і хваробу ў інтэнцыі Кармэлю, з якім адчувала цесную сувязь.
Да канца сваіх дзён успамагала святароў, клерыкаў і вернікаў, якія лічылі яе святой
(парафіяне за незвычайную дабрыню называлі яе проста сястра Юзя або Юзэфка). Апошні
перыяд свайго жыцця яна правяла ў кляштары кармэлітанак Дзіцятка Езус у Гудагаі, якія
ўдзялілі святой памяці сястры Юзэфе памяшканне і акружылі апекай. Памолімся за
памерлую Сястру і будзем спадзявацца, што ў валадарстве Бога, якога ў сваёй пакоры
і глыбокім даверы праслаўляла на зямлі, будзе заступацца таксама за нас.