(20.12.2007 RV)Mbledhja e djeshme
e Këshillit të Sigurimit për Kosovën përfundoi pa ndonjë të re. Vendet dolën nga salla
me dyer të mbyllura, duke ruajtur qëndrimet e tyre. Serbia, e mbështetur nga Rusia,
kërkoi shtyrjen e bisedimeve, por si SHBA-të, ashtu edhe Bashkimi Evropian e bënë
të qartë se koha e negociatave ka përfunduar. Sipas deklaratës së ministrit të jashtëm
italian, Masimo D’Alema, që drejtoi mbledhjen, Bashkimi Evropian do të vazhdojë përgatitjen
për misionin që do të disllokohet në Kosovë, pa Këshillin e Sigurimit. D’Alema sqaroi
edhe se nuk mund të flitet për pavarësi të plotë, por për pavarësi të mbikqyrur nga
bashkësia ndërkombëtare, e kjo është për momentin perspektiva e Kosovës. Edhe
ministri i jashtëm slloven, Dimitrij Rupel, duke folur sot në Bruksel për përparësitë
e gjashtëmujorit të presidencës së Bashkimit Evropian, që Sllovenia e merr më 1 janar
2008, mbështeti idenë e pavarësisë së kufizuar për Kosovën. Ai madje, theksoi se misioni
evropian do të shkojë në Kosovë duke respektuar rezolutën 1244 të OKB-së. Për aspektet
teknike të disllokimit në vend do të flitet në mbledhjen e ministrave të jashtëm të
Bashkimit Evropian, që do të zhvillohet më 28 janar. Ndërkaq, shërbimet sekrete
ndërkombëtare paralajmërojnë për rrezikun e rritjes së tensionit, jo vetëm në Kosovë,
por në të gjithë rajonin e Ballkanit. Në zonat pranë Mitrovicës, po armatosen si serbët,
ashtu edhe shqiptarët. Rreziku vjen edhe nga Bosnja, ku pjesë të ndryshme të popullsisë
mund të mobilizohen për t’u bashkuar me njërën ose me tjetrën palë. Të dëgjojmë mendimin
e historianit italian Roberto Moroco dela Roka, docent i historisë së Evropës Lindore
në Universitetin Roma III: Dyshimi që ngrenë shumë vetë është ai i një reagimi
ushtarak serb. Në të vërtetë, qeveria serbe ka deklaruar se nuk do të reagojë ushtarakisht.
Por disa mendojnë se ajo do të përpiqet të pushtojë zonën veriore të Mitrovicës, ku
banon pjesa serbe e Kosovës. Ky territor mund të ishte një lloj kompensimi për serbët
në negociatat për statusin, por nuk u është ofruar kurrë atyre.