Benedikti XVI fëmijëve të Veprimit katolik italian: “Ndiqeni Krishtin si Nenolina,
duke ecur gjatë mbirrugës që çon në shenjtëri.
(20.12.2007 RV)Shenjtëria nuk ka
moshë e çdo stinë e jetës mund të jetë e përshtatshme për ta dashur mbi gjithçka Krishtin,
siç bëri Antonieta Meo, e njohur si Nenolina, e cila vdiq shenjtërisht në moshën gjashtë
vjeç e gjysëm. Pak ditë më parë Papa i njohu virtytet heroike shenjtores më të re,
jo martire, në historinë e Kishës katolike. E pikërisht këtë figurë të jashtëzakonshme
sot paradite Benedikti XVI ia paraqiti si shembull 40 përfaqësuesve të Veprimit katolik
të fëmijëve italianë, të cilët i priti në audiencë në Sallën e Konçistorit në Vatikan,
për shkëmbimin e urimeve të Krishtlindjes. Ajo e shenjtërisë është rrugë, po ka
nga ata që e arrijnë cakun me shpejtësi të jashtëzakonshme, duke e shndërruar në mbirrugë.
Këtë figurë përdori sot Papa në takimin me fëmijët e Veprimit katolik italian, me
të cilët reflektoi mbi vlerën e dëshmisë së krishterë që në moshë të njomë, duke ecur
në gjurmët e Nenolinës, anëtare e Veprimit katolik të kohës së saj, që diti të fitojë
mbi sëmundjen e mbi vdekjen, duke arritur cakun e shenjtërisë: “Jeta e saj,
sa e thjeshtë, aq e rëndësishme, tregon se shenjtëria është për të gjitha moshat:
për fëmijët e për të rinjtë, për të rriturit e për pleqtë. Çdo stinë e jetës sonë
mund të jetë e mirë për ta dashur seriozisht e për ta ndjekur besnikërisht Jezusin.
Në pak vite, Nenolina arriti majën e përsosurisë së krishterë, në të cilën jemi të
thirrur të ngjitemi të gjithë, duke përshkuar kështu ‘mbirrugën’ që çon tek Jezusi”.