Benedikti XVI në audiencën e fundit të përgjithshme të 2007-tës uron: “Jezusi i sjelltë
njerëzimit paqe e drejtësi”.
(19.12.2007 RV)Çdo i krishterë
e ka për detyrë ta kumtojë të vërtetën e Krishtlindjes, lindjen e Foshnjës së Betlehemit,
që ndryshoi historinë e njeriut: është porosia që u dha sot Papa besimtarëve në audiencën
e 44-t dhe të fundit të përgjithshme për vitin 2007, mbajtur në Sallën e Palit VI.
Papa uroi që në këtë Krishtlindje të realizohen shpresat e njerëzimit për paqe e drejtësi.
Ndërkaq Prefektura e Shtëpisë Papnore njoftoi se gjatë vitit 2007 në takimin tradicional
të së mërkurës në Sheshin e Shën Pjetrit ose në Sallën e Palit VI, kanë marrë pjesë
624 mijë shtegtarë. Por, të rikthehemi tek audienca e sotme, që u mbajt në atmosferën
festive plot tinguj muzike e këngësh, kënduar nga koret e Krishtlindjes. “Gjithë
jeta e njeriut është pritje e, për ne të krishterët, pritje përplot me shpresë ungjillore”:
ky është reflektimi i Benediktit XVI, i cili nënvizoi se Koha e Ardhjes, për antonomazi
kohë e pritjes vigjilente, na shtyn t’i rijetojmë shpirtërisht emocionet e Marisë
e të Jozefit, në ditët kur prisnin lindjen e mrekullueshme të Jezusit. Prandaj, posaçërisht
në këto ditë, dishepulli i Krishtit është i thirrur ta gatitë zemrën për ta pritur
Zotin që vjen: “Pritja e besimtarit shpreh kështu shpresën e mbarë njerëzimit,
i cili dëshiron, nganjëherë në mënyrë të pavetëdijshme, shëlbimin që vetëm Hyji mund
të na e dhurojë”. Lutjet e Nëntëditshes së Krishtlindjes – shtoi Papa – shprehin
pritjen për dhuratën e lindjes së Shëlbuesit të premtuar. Është një ngjarje e madhe,
që kërkon nga secili prej nesh t’i përgatisë një banesë të denjë jo vetëm në ambientin
që na rrethon, por sidomos në shpirt. Më pas Papa shtoi, jashtë tekstit zyrtar, një
reflektim mbi kuptimin e vigjilencës në Kohën e Ardhjes. “Vigjilencë – tha Shenjtëria
e Tij – do të thotë të jetosh nën sytë e gjykatësit e ta përgatisësh vetveten e botën
për t’u paraqitur para Drejtësisë. Në këtë mënyrë – vijoi Ati i Shenjtë – duke jetuar
poshtë syve të Hyjit Gjyqtar, mund t’i hapim portat e botës për ardhjen e Birit të
tij e portat e zemrave tona, për ta pritur Zotin që vjen. “Ndoshta sot ne,
edhe si besimtarë, nuk e presim realisht Gjykatësin, por pa dyshim të gjithë presim
drejtësinë, sepse shikojmë shumë padrejtësi në botë, në botën tonë të vogël, në botën
e shtëpisë, të lagjes e në botën e madhe të shteteve e të shoqërisë. Presim me padurim
të mbrohet e drejta. Në këtë kuptim lutemi: “Eja, o Jezu Krisht, si gjykatës në botën
tënde!” E Zoti e di si të hyjë në botë e të vendosë drejtësinë”. Më pas Papa
foli për mënyrën si e shikon sot lindjen e Jezusit bota e shekullarizuar, kaotike
dhe i nxiti besimtarët ta dëshmojnë misterin e shëlbimit, që sjell me vete kremtimi
i Krishtlindjes. “Në se nuk pranohet që Hyji u bë njeri, ç’kuptim ka Krishtlindja?
Duhet që, sidomos ne, të krishterët, ta ripohojmë me bindje të thellë e të ndjerë
të vërtetën e Lindjes së Krishtit, për t’u dëshmuar të gjithëve vetëdijen e një dhurate
të pashembullt, që është pasuri jo vetëm për ne, por për të gjithë”. Nga ky
mister buron detyra e ungjillëzimit, që është pikërisht komunikimi i këtij lajmi të
mirë – tha Papa – dhe kujtoi, në vijim, Notën e Kongregatës për Doktrinën e Fesë mbi
ungjillëzimin. Më pas Benedikti XVI iu lut Zotit t’i japë paqen njerëzimit dhe
ta nxisë të jetë më i ndjeshëm ndaj formave të vjetra e të reja të varfërisë e ndaj
së mirës së përbashkët. Në përfundim Ati i Shenjtë uroi që Krishtlindja të jetë për
të gjithë festë e paqes dhe e gëzimit.