(14.12.2007 RV)Samiti i Balit në Indonezi për klimën vazhdon derisa të arrihet
një marrëveshje ndërmjet të mëdhenjve të kësaj bote. Qëllimi është reduktimi i gazrave
që ndotin atmosferën dhe shkaktojnë efektin serë në masën 25-40% deri në vitin 2020,
duke përcaktuar kështu një protokoll, që të zëvendësojë e të jetë vazhdim i atij të
Kiotos. Ky të paktën është objektivi i Bashkimit Evropian dhe i OKB-së, i kundërshtuar
nga SHBA-të dhe Kanadaja, që janë përgjegjëse për 50% të ndotjes atmosferike. Por,
pasdite tonet ishin më optimiste e mesa duket marrëveshja do të arrihet. Presidenca
portugeze e Bashkimit Evropian ka thirrur urgjentisht për këtë ministrat e ambientit.
Një kuriozitet: qindra vetë kanë protestuar para ndërtesës, ku bëhet mbledhja. Në
mesin e turmës spikatën edhe disa persona me flamurin shqiptar në duar. Një këmbanë
paralajmëruese për qeverinë e Tiranës, e cila është marrë tepër pak me përmirësimin
e ndotjes së ambientit në Shqipëri, ku në vende të caktuara tejkalon çdo nivel të
lejuar.