Dita e nesërme dhe 19 dhjetori, ditë të rëndësishme për Kosovën
(13.12.2007 RV)Dita e nesërme dhe e mërkura e ardhshme, 19 dhjetor, janë shumë
të rëndësishme për fatin e Kosovës. Nesër, dosja e ndërlikuar e Kosovës do të jetë
në tryezën e krerëve të shteteve të Bashkimit Evropian, që do të mblidhen në Bruksel
për të siguruar unitetin e një vendimi që duket se tashmë është përcaktuar. Kosovës
do t’i njihet satusi i pavarësisë së mbikqyrur, sipas planit të Ahtisarit. Të
mërkurën, do të jetë ministri i jashtëm italian, Masimo D’Alema, ai që do të kryesojë
Këshillin e Sigurimit të OKB-së, ku do të marrin pjesë edhe presidenti e kryeministri
i Kosovës. Nuk dihet akoma nëse atyre do t’u jepet fjala dhe ende nuk është vendosur
nëse Këshilli do të punojë me dyer të mbyllura. Sipas zëdhënësit të Ministrisë së
jashtme Italiane, Pasquale Ferrara, Bashkimi Evropian do të marrë si një i vetëm vendimin
e vet, pasi të përfundojë Këshilli i Sigurimit i OKB-së. Bashkësia ndërkombëtare ka
një program me hapa të përcaktuar mirë dhe pret që serbët e kosovarët të japin prova
përgjegjësie. Ndërkaq, sekretari italian i punëve të jashtme, Famiano Kruçaneli
është takuar sot në Moskë me zv-ministrin e jashtëm rus, Aleksandër Grushko, të cilit
i ka kërkuar që Rusia të ketë një rol më konstruktiv në vendimin për statusin e Kosovës.