(11.12.2007 RV)Rezoluta 1244, që parashikon krijimin e një administrate ndërkombëtare
në Kosovë, e cila ka gjetur shprehjen e vet në formimin e UNMIK-ut, thyhet nga vetë
serbët. Beogradi ka hapur një zyrë të vetën në Mitrovicë, pikërisht në pjesën veriore
të banuar nga shumica serbe. Menjëherë kanë protestuar si presidenti i Kosovës, Fatmir
Sejdiu, ashtu edhe shefi i UNMIK-ut, Joakim Ryker. Për këtë akt të djeshëm të Serbisë
priten direktiva nga Nju Jorku. Pikërisht për gjendjen
e krijuar në Kosovë, në këto momente, flet për ne drejtori i Veprës saleziane në Prishtinë,
don Mateo Di Fiore. Ta dëgjojmë: Perspektiva e popullit kosovar është pa dyshim
pavarësia. Sigurisht që situata në këtë periudhë, por tashmë prej vitesh, është pak
e nderë, sidomos sepse populli kosovar nuk e njeh të ardhmen e vet. Situata ndikon
psikologjikisht në të, me efekt pasigurinë, frikën, shqetësimin, por edhe me pasoja
ekonomiko-shoqërore. Prandaj pritet me padurim deklarata e pavarësisë, me shpresën
se do të hapet një faqe e re. E pas kësaj mund të përmirësohet jeta e njerëzve,
sipas jush? Sigurisht që nuk mund të vazhdojë kështu. Sot kemi një varfëri
të madhe ekonomike: Kosova është vendi më i varfër i Evropës. 15% e popullsisë jeton
në varfëri të skajshme. Papunësia është e jashtëzakonshme, prandaj njerëzit kërkojnë
ndryshime me perspektivë përmirësimin e situatës. Sa fiton sot një kosovar? Si
punonjësit e shtetit, ashtu edhe privatët, fitojnë rreth 150-200 euro në muaj. Kombet
e Bashkuara janë fortësisht të pranishme, por pak efikase. Nga ana tjetër, unë mendoj
se zgjidhja duhet të vijë nga brenda popullit kosovar. Me pavarësinë, mund të fillojë
një fazë e re politike. Kombet e Bashkuara dhe Evropa kanë për detyrë ta shoqërojnë
vendin drejt rregullit dhe autonomisë ekonomike, shoqërore e politike.
Pasi
presidenti Sejdiu i dha detyrën e kryeministrit të qeverisë së re të Kosovës, fitimtarit
të zgjedhjeve të 17 nëntorit, kreut të Partisë Demokratike të Kosovës, Hashim Thaçi,
ky i fundit ka filluar sot zyrtarisht bisedimet për formimin e kabinetit qeveritar.
Aleanca e mundshme është ndërmjet partisë së Thaçit, Lidhjes Demokratike të Kosovës
dhe partisë së afaristit Bexhet Pacolli, AKR.