Udhës së Betlehemit

(08.12.2007 RV) Të dashur miq, në vijim të ciklit të emisioneve ‘Udhës së Betlehemit’ po shfletojmë sot Ungjillin sipas Lukës (Lk. 2,1-21), duke u ndalur tek rrëfimi i tij mbi lindjen e Jezusit:
¹ Në atë kohë Cezari August dha urdhër të bëhej regjistrimi i popullsisë së mbarë botës. ² Ky qe regjistrimi i parë, kur Kuirini ishte qeveritari i Sirisë. ³ Të gjithë shkonin të regjistroheshin, secili në qytetin e vet. ⁴ Kështu edhe Jozefi, mbasi ishte prej shtëpisë dhe prej fisit të Davidit, u ngjit, prej qytetit të Nazaretit të Galilesë, në Jude, në qytetin e Davidit, që quhej Betlehem, ⁵ për t’u regjistruar bashkë me Marinë, fatin e vet, që ishte shtatzënë.
⁶ Tashti, ndërsa ata po gjendeshin atje, i erdhi koha të lindë. ⁷ Ajo lindi djalin e vet- të parëlindurin, e mbështolli në shpërgënj dhe e vendosi në grazhd, sepse në bujtinë nuk pati vend për ta.
Barinjtë dhe engjëjt
⁸ Në atë vend ishin disa barinj, të cilët e kalonin natën përjashta për të ruajtur grigjën e vet. ⁹ Engjelli i Zotit u afrua tek ata dhe lavdia e Zotit i shndriti e ata u trembën për së tepërmi.
¹⁰ Engjëlli u tha:
“Mos kini frikë! Ja, unë po ju sjell një lajm të mirë: gëzim të madh për mbarë popullin! ¹¹ Sot, në qytet të Davidit, ju lindi Shëlbuesi – Krishti Zot! ¹² Dhe, ja shenja për ta njohur: do të gjeni një foshnjë të mbështjellë me shpërgënj e të vënë në grazhd”.
¹³ Engjëllit menjëherë iu bashkua një ushtri e madhe qiellore, që madhëronte Hyjin e brohoriste:
¹⁴ “Lavdi Hyjit në më të lartin qiell
e paqe mbi tokë njerëzve,
që i ka për zemër!”.
¹⁵ Posa engjëjt u larguan prej tyre në qiell, barinjtë i thanë njëri–tjetrit:
“Ejani të shkojmë, pra, deri në Betlehem e të shohim çka ndodhi - ngjarjen që na e kumtoi Zoti”
¹⁶ Shkuan me nxitim dhe gjetën Marinë, Jozefin e Foshnjën të vënë në grazhd. ¹⁷ Kur e panë, u treguan ç’u tha engjëlli për Foshnjën. ¹⁸ Të gjithë ata që i dëgjuan, u mrekulluan nga ato që thanë barinjtë. ¹⁹ Maria i mbante mend me kujdes të gjitha këto ngjarje dhe i shoshiste në zemrën e vet.
²⁰ Barinjtë, mandej, u kthyen duke lëvduar e madhëruar Hyjin për gjithçka kishin dëgjuar e parë, pikërisht ashtu siç u tha ëngjëlli.
²¹ Kur u mbushën tetë ditë për të rrethprerë Foshnjën, ia ngjitën emrin Jezus, sikurse e quajti engjëlli para se të zihej në kraharor.
 Nga Bibla: përkthim i mons. Simon Filipajt