(09.12.2007 RV)Ndërsa në Lurdë u hapen kremtimet e 150- vjetorit të dukjeve
të Virgjërës Mari, përkujtimi i Shën Huan Diegos na çon simbolikisht në shenjtëroren
më të madhe mariane të botës, që lartohet mbi kodrën e Tepeyakut, mes malesh e vullkanesh,
me lartësi që i kalojnë të pesë mijë metrat. Është Shenjtërorja e Zojës së Guadalupes,
e cila pavarësisht nga ndryshimet e thella që vërehen rreth saj, vijon të jetë pikë
e sigurtë referimi për meksikanët e të gjitha etnive, të të gjitha konfesioneve fetare.
Një tregim i lashtë guadalupan i indianëve rrëfen: "Paraardhësit tanë i ofronin
Zotit zemra prej mishi, të shkulura nga kraharori njerëzor, që në botë të kishte harmoni.
Ndërsa Gruaja, që nderohet në shenjtërore, pa na i shkulur nga gjoksi, na bën t'i
lemë vetë zemrat tona në duart e saj, që ajo, pastaj, t'ia paraqesë Zotit të vërtetë!
Sot Kisha përkujton pikërisht vitin e largët 1531, kur Virgjëra Mari iu duk papritmas
fshtarit të varfër të fisit Çiçimek, Huan Diegos, një nga vendasit e parë të kthyer
në kristianizëm, të cilin ipeshkvi i vendit nuk deshi ta besonte - për ta bërë lajmëtar
të Ungjillit. E mbi mantelin e tij e la fytyrën e saj, një fytyrë metise, origjinën
e së cilës shkenca nuk ka arritur ta shpjegojë. Iu duk pesë herë me radhë, ndërmjet
9 e 12 dhjetorit 1531.Huan Diego u shpall i Lum në vitin 1990. U kanonizua nga Papa
Gjon Pali II më 31 korrik 2002, gjatë vizitës së tij të pestë baritore në Meksikë.
Shenjti i parë meksikan, që Kisha e kujton më 9 dhjetor, njihet si ambasador i Zojës
së Guadalupes në botë.