Atë Federiko Lombardi: ‘Të krishterët e myslimanët janë vënë për udhë”. (Editorial
i ‘Octava dies’, 8 dhjetor 2007)
(08.12.2007 RV)Papa- shkruan Atë Lombardi, drejtor i Sallës së Shtypit të Vatikanit
dhe i Radios sonë - iu përgjigj, në mesin e nëntorit, Letrës që 138 krerë myslimanë
i patën dërguar atij dhe autoriteteve të tjera fetare kristiane në tetor, në sa përfundonte
Ramazani. Ishte një letër e rëndësishme, që vinte në dukje pjesët kryesore të Kuranit
e të Biblës së krishterë, që flasin për dashurinë ndaj Hyjit e ndaj të afërmit, me
qëllim që të nxitej impenjimi i përbashkët për paqen në mbarë botën, mbi bazën e
mirëkuptimit më të thellë reciprok. Fryma pozitive e Letrës ndjehet që nga titulli:
“Një fjalë e përbashkët ndërmjet nesh e jush”, citim i një vargu të Kuranit drejtuar
‘njerëzve të Librit’ hebrenjve e të krishterëve. Përgjigja e Papës kujton se nuk
është e nevojshme të nënvleftësohen ndryshimet, por edhe ajo vë në dukje posaçërisht
atë që bashkon; i inkurajon të gjithë për respekt dhe njohje reciproke, për njohje
reale të dinjitetit të çdo njeriu; shpreh besimin e sinqertë në udhën e përbashkët
të mikpritjes, premtuese për promovimin e drejtësisë e të paqes. Por Papa nuk mjaftohet
vetëm me fjalë. E fton Princin mysliman Ghazi të Jordanisë të vijë në Romë me një
delegacion të promotorëve të Letrës së përbashkët dhe propozon një takim reflektimi
e studimi me Këshillin Papnor për Dialogun Ndërfetar dhe disa institucione të tjera
akademike katolike, të specializuara në këtë fushë. E kjo do të thotë se Papa beson
në dialogun – në një dialog të sinqertë e të ndershëm, natyrisht. Edhe ndërmjet myslimanëve
ka shumë bashkëbisedues të urtë e me autoritet, të vetëdijshëm për sfidat e njerëzimit
të sotëm; dhe është pozitiv fakti se ndërmjet tyre po rritet aftësia për të shprehur
vullnetin e përbashkët për paqen. Drejtimi është i saktë. Duhet ta ndihmojnë njëri-tjetrin
për të vijuar udhën e nisur.