(04.12.2007 RV)Sekretari i Vatikanit për Marrëdhëniet me Shtetet, Dominik Mambertì
priti sot ministrin e jashtëm të Shqipërisë, Lulzim Basha, i cili ndodhej për vizitë
në Vatikan. U fol për çështjet e përbashkëta ndërmjet dy shteteve. Pasdite, Basha
u takua me ministrin e jashtëm italian, Masimo D’Alema. Me kryeipeshkvin Dominik
Mambertì, ministri i jashtëm i Shqipërisë u ndal në bisedë për dy marrëveshjet e rëndësishme
që u nënshkruan kohët e fundit me Selinë e Shenjtë: ajo në fushën e shëndetësisë,
me spitalin “Bambin Gesù” në Romë dhe ajo në fushën e së drejtës tatimore në Tiranë.
Lulzim Basha e ftoi sekretarin për marrëdhëniet me shtetet për një vizitë në Shqipëri
dhe shprehu edhe dëshirën e qeverisë për një vizitë të ardhshme të Papës Benedikti
XVI në vend. U fol gjithashtu edhe për çështjen e Kosovës, ku Basha sqaroi se Tirana
mbështet planin e Ahtisarit. Imzot Mambertì theksoi nevojën që çështja e Kosovës të
zgjidhet në mënyrë paqësore.