Imzot Mambertì: ‘Një nga sfidat më të mëdha për stabilitetin e sigurinë në botë është
lufta kundër intolerancës fetare’.
(04.12.2007 RV)‘Sfida e perspektiva për sigurinë dhe stabilitetin panevropian’
ishte tema kryesore e fjalës që mbajti, pak ditë më parë, kryeipeshkvi Dominik Mambertì,
sekretar i Vatikanit për marrëdhëniet me shtetet, në Madrid të Spanjës, në kuadrin
e Këshillit Ministror të OSBE-së, në të cilin bëjnë pjesë 55 vende: të gjitha vendet
evropiane, SHBA, Kanadaja, Turqia dhe republikat aziatike të ish-Bashkimit Sovjetik.
“Nuk i takon Selisë së Shenjtë të flasë për probleme ngushtësisht politike, e as që
ka dëshirë ta bëjë këtë – theksoi prelati. Ajo që kërkon, është të respektohen e vërteta
dhe drejtësia, të mbahen premtimet e të mos dëmtohen interesat legjitime dhe kërkesat
e drejta të të tjerëve. Imzot Mambertì foli qartë: përfundojnë së shpejti disa afate
të caktuara në agjendën e OSBE-së, që kërkojnë dialog e bashkëpunim, ndërsa kërcënimet
e vazhdueshme dhe konfliktet e papërfunduara – nënvizoi Sekretari i Vatikanit për
marrëdhëniet me shtetet - dëshmojnë se stabiliteti e paqja janë kantiere ende të
hapura.