(04.12.2007 RV)Qeveria shqiptare do të kërkojë që rruga Durrës-Kukës-Prishtinë
të zgjatet deri në Nish të Serbisë. Deklarata është bërë nga kryeministri i Shqipërisë,
Sali Berisha në takimin e tretë vjetor të ministrave të transportit të Ballkanit.
Berisha kërkoi gjithashtu, që Brukseli të përshpejtojë miratimin e korridorit 8. Ndërtimi
i këtyre infrastrukturave do të siguronte më tepër lidhje për krejt zonën dhe daljen
e vendeve fqinjë në det.
Jo më larg se dje u kremtua Dita Botërore e luftës
kundër Sidës, sëmundje vdekjeprurëse që ka infektuar mëse 30 milion vetë në të gjithë
planetin. Dikur në Shqipëri, kjo sëmundje as nuk njihej, por tani po përhapet me ritme
të shpejta, siç tregojnë të dhënat e Institutit të Shëndetit Publik. Në Shqipëri rezultojnë
251 të sëmurë nga Sida, por mendohet se numri i tyre i afrohet njëmijëshit.
Arësyeja e moszbulimit të të sëmurëve, sipas Institutit, qëndron në mungesën e testimit
dhe të diagnostikimit të sëmundjes. Vetëm vitin e fundit, janë zbuluar 40 raste të
reja dhe është në rritje numri i femrave të infektuara.
Studentët e
Tiranës nuk mund të zhvillojnë normalisht mësimin në orët e pasdites, për shkak
të mungesës së energjisë elektrike. Gjendja është aq alarmuese, sa e ka shtyrë rektorin
e Universitetit Politeknik të deklarojë se është e nevojshme të shtyhen provimet.
Tiranës i mungojnë dritat nga ora 16 deri në orën 20. Ankesat pranë Ministrisë së
Arësimit dhe pranë KESH-it kanë rënë në vesh të shurdhër.