Sanader fiton jo bindshëm në Kroaci e lajme të tjera
(26.11.2007 RV)U zhvilluan dje zgjedhjet parlamentare në Kroaci. Siç pritej,
rezultatet nuk i japin mazhorancën absolute asnjërës prej partive kryesore në garë:
Bashkimit Demokratik Kroat të kryeministrit aktual Ivo Sanader dhe Partisë Socialdemokrate
në opozitë. Me 95% të votave të numëruara, partia e kryeministrit Sanader ka fituar
61 vende në parlament, përkundrejt 57 vendeve të socialdemokratëve. Rezultatet zyrtare
përfundimtare do të shpallen më 5 dhjetor, por duket qartë se një rol vendimtar do
të kenë partitë më të vogla dhe 8 të zgjedhurit e pakicave etnike, me të cilët Sanader
duhet të krijojë koalicion, nëse dëshiron të qeverisë vendin.
Presidenti
rus Vladimir Putin ka kërkuar reforma në OSBE, organizatën për siguri e bashkëpunim
në Evropë, pasi kjo e fundit vendosi të mos vëzhgojë zgjedhjet parlamentare të 2 dhjetorit.
Sipas presidentit Putin, janë SHBA-të ato që kanë frymëzuar bojkotimin e zgjedhjeve
nga vëzhguesit evropianë. Pavarësisht nga kjo, ose pikërisht për këtë arësye, Rusia
tregohet më e butë ndaj planit amerikan për vendosjen e mbrojtjes me raketa në Poloni
e Çeki. Moska është gati të ulet në tryezën e bisedimeve me Uashingtonin. Ndërkaq,
Bashkimi Evropian ka shprehur shqetësim për shtypjen e manifestimeve të opozitës ruse
gjatë fundjavës që kaloi. Në këtë klimë, Këshilli i Federatës njoftoi se zgjedhjet
presidenciale në Rusi do të mbahen më 2 mars 2008.
Gjatë natës së djeshme,
periferia e Parisit u ndez sërish, si në vjeshtën e vitit 2005. Si atëherë,
shkaku qe vdekja e dy të rinjve, 15 dhe 16 vjeç, në një aksident rrugor me një makinë
të policisë. Banorët filluan protestën, e cila shpejt u shndërrua në dhunë dhe ndeshje
me policinë. Bilanci i parë flet për 25 policë dhe një zjarrfikës të plagosur, 28
makina, katër ndërtesa e një zyrë e policisë në flakë, si edhe nëntë të arrestuar.
Qetësia u rivendos vetëm pas orës 1 të natës.