Madhështia e vërtetë e krishterë duhet kërkuar tek shërbimi e jo tek sundimi: kështu
u shpreh Papa në Koncistorin për krijimin e 23 kardinajve të rinj, të cilët i ftoi
të jenë dëshmitarë të shpresës ungjillore.
(24.11.2007 RV)Çdo nxënës i vërtetë i Krishtit merr pjesë në mundimet e Tij,
pa kërkuar kurrfarë shpërblimi. Me këto fjalë iu drejtua Benedikti XVI 23 kardinajve
të rinj, nga të cilët 18 me të drejtë zgjedhore, krijuar në Koncistorin e kremtuar
sot paradite në Bazilikën e Vatikanit. Një kremtim tejèt prekës - siç u shpreh edhe
vetë Papa – sepse pasqyroi qartë unitetin e kardinajve rreth Pasardhësit të Pjetrit,
por edhe një rast providencial për t’i dhënë qytetit të Romës e botës mbarë dëshminë
e këtij uniteti, që i lidh ngushtë kardinajtë me Papën: kështu e përmblodhi Benedikti
XVI vlerën e jashtëzakonshme të Koncistorit të sotëm për krijimin e 23 kardinajve
të rinj. Një shenjë e qartë e unitetit katolik - vijoi Ati i Shenjtë – që shkakton
përherë emocione të posaçme. Komentoi, kështu, fragmentin e Ungjillit sipas Lukës,
në të cilin nxënësit e Krishtit shprehin dëshirën arriviste për të zënë vendet më
të mira në mbretërinë mesianike. Jezusi – vërejti Benedikti XVI, e qorton konceptimin
e tyre trashanik, sipas të cilit njeriu mund të kërkojë të drejta prej Zotit. Tepër
aktual ky qortim: “Marku Ungjilltar na kujton, të dashur e të nderuar Vëllezër,
se çdo nxënës i vërtetë i Krishtit mund të synojë një gjë të vetme: të marrë pjesë
në mundimet e Tij, pa kërkuar kurrfarë shpërblimi. I krishteri, duke ecur në gjurmët
e Krishtit, është i thirrur të bëhet shërbëtor e ta shkrijë gjithë jetën e vet për
të tjerët, krejt falas e pa kurrfarë interesi. Çdo gjest e çdo fjalë e jona duhet
të jetë dhuratë e përvujtë e vetvetes për të mirën e Kishës e jo etje për pushtet
e për sukses. Madhështia e vërtetë e krishterë nuk duhet kërkuar tek sundimi, por
tek shërbimi”. Ja, ky është ideali që duhet të orientojë shërbimin tonë – tha
Papa - duke nënvizuar se kardinajve të rinj Zoti u kërkon e u beson “shërbimin e dashurisë
deri në derdhjen e gjakut: ”Dashuri për Hyjin, dashuri për Kishën e tij, dashuri
për vëllezërit me dedikimin më të madh e më të pakushtëzuar, usque ad sanguinis effusionem,
siç na kujton formula për vënien e kapuçit e siç e tregon edhe ngjyra e kuqe e veshjes
që mbani” Kremtimi i sotëm – vijoi Papa – nënvizon përgjegjësinë e madhe që
peshon mbi kardinajtë, të cilët janë thirrur nga Krishti të dëshmojnë para njerëzve
të vërtetën e tij, t’i kushtohen e ta kumtojnë kauzën e tij. Një kumtim – vërejti
Papa – që duhet bërë me ëmbëlsi, me respekt e drejtësi, dmth me përvujtërinë shpirtërore
që është fryt i bashkëpunimit me hirin e Hyjit. Është një përgjegjësi që nuk të shpëton
nga rreziqet – vërejti Ati i Shenjtë – por, siç na kujton Pjetri, në se kështu do
Zoti, është më e pëlqyeshme të vuash duke bërë mirë, sesa të bësh keq. Më pas Benedikti
XVI foli për rolin e Kolegjit Kishtar të Kardinajve, në të cilin – shpjegoi Papa
– rijeton presbiteri i lashtë i Ipeshkvit të Romës, anëtarët e të cilit, ndërsa zhvillonin
funksione baritore e liturgjike në Kishat e ndryshme, bashkëpunonin ngushtësisht
me Pasardhësin e Pjetrit në përmbushjen e detyrave që lidhen me shërbimin e tij universal
apostolik: “Kohët kanë ndryshuar e familja e madhe e nxënësve të Krishtit
është përhapur sot në të gjitha kontinentet, deri në skajet më të largëta të tokës,
flet të gjitha gjuhët e botës e përfshin popuj të të gjitha kulturave. Larmia e anëtarëve
të Kolegjit Kardinalor, që vijnë nga zona të ndryshme gjeografike e kulturore, vë
në dukje jo vetëm këtë përhapje providenciale, por njëkohësisht edhe kërkesat baritore,
të cilave duhet t’u përgjigjet Papa”. Universaliteti, katoliciteti – pohoi
Ati i Shenjtë – pasqyrohet qartë në përbërjen e Kolegjit të kardinajve. Secili nga
ju – vijoi Benedikti XVI duke iu drejtuar kardinajve të rinj – përfaqëson një pjesë
të Korpit mistik të Krishtit, që është Kisha e përhapur në të katër anët. Më pas Papa
kujtoi posaçërisht bashkësitë e krishtera, të cilat ndodhen para sfidash të mëdha,
kalojnë vështirësi e provojnë vuajtje të të gjitha natyrave: “Ndërmjet tyre,
si të mos kujtojmë me shqetësim e dashuri, në këtë çast gëzimi, bashkësitë e krishtera
që jetojnë në Irak? Këta vëllezër e motra në fe provojnë në korpin e tyre pasojat
dramatike të një konflikti, që s’i duket fundi e jetojnë në një situatë politike
tepër delikate e të paqëndrueshme. Duke thirrur për të hyrë në Kolegjin Kardinalor
Patrikun e Kishës kaldeje, desha të shpreh në mënyrë konkrete afërsinë time shpirtërore
dhe dashurinë time për këto popullsi”. Më pas Ati i Shenjtë ripohoi solidaritetin
e mbarë Kishës për të krishterët e tokës së dashur irakiane, duke iu lutur Zotit
të mëshirshëm t’u dhurojë pajtimin e paqen të gjithë popujve që pësojnë nga konflikti.
Afërsinë me Kishën irakiane e shprehu me forcë edhe kardinali i ri, Leonardo Sandri,
i cili e përshëndeti Papën në emër të të gjithë kardinajve të sapokrijuar, duke theksuar
posaçërisht besnikërinë ndaj Pasardhësit të Pjetrit: “Jemi e do të jemi pranë
Jush, Atë i Shenjtë, në çaste të jashtëzakonshme e të zakonshme të shërbimit papnor.
Dëshirojmë të mbetemi me Papën si kur bëhet shërbëtor i së vërtetës dhe shpall parinë
e Zotit, ashtu edhe kur i prin Kishës në rrugën e përtëritjes, që buron nga besnikëria
ndaj traditës; si kur bën thirrje për paqe, duke theksuar forcën e lutjes e të dialogut,
ashtu edhe kur nxit unitetin e të krishterëve e respektin për të gjitha fetë e kulturat,
duke përjashtuar çdo lloj dhune”. Në këtë ditë gëzimi, Papa kujtoi edhe të
ndjerin imzot Ignaci Jesh, që u kthye në shtëpinë e Atit qiellor pak para se të lartohej
në dinjitetin kardinalor. Kujtoi edhe se nesër, gjithnjë në Bazilikën e Vatikanit,
do të kremtojë Meshën me kardinajtë e rinj, të cilëve do t’u dorëzojë unazën kardinalore.
Eshtë një rast shumë i përshtatshëm – tha Papa – për të ripohuar unitetin tonë në
Krishtin e për të përsëritur vullnetin tonë që t’i shërbejmë me përkushtim të plotë”.Kujtojmë
se marrja e unazës do të jetë përsëritje e ‘po’-së së kardinajve të rinj, përsëritje
e përgjigjes ‘Ja ku jam , o Zot!’ që ia thonë Zotit Jezus, i cili i ka zgjedhur e
i ka caktuar. Ia thonë edhe Kishës së Tij shenjte, së cilës janë të thirrur t’i shërbejnë
me dashuri, sepse unaza i lidh në martesë simbolike me Kishën e Krishtit. Dy përmasat
e Kishës, mariane e petrine, takohen në atë që përbën përmbushjen e të dyjave, do
me thënë, në vlerën e lartë të dashurisë, ‘karizma më e madhe’ e ‘rruga më e mirë
nga të gjitha’, siç shkruan Shën Pali Apostull”.