Kisha përkujtoi festën e Paraqitjes së Zojës së Bekuar në tempull dhe kremtoi Ditën
e Klaustraleve.
(21.11.2007 RV)Mbi paraqitjen e Zojës në tempull, për t’iu kushtuar Zotit qysh
në foshnjëri, na flasin vetëm tradita dhe shkrimet apokrife. Liturgjia lindore e kremtoi
festën që në shekullin e katërt, ndërsa në Perëndim hyri në Kishë rreth shekullit
XIV. E kremtja përkujton kushtimin e Virgjërës Hyut me shpirt e me trup. Me ketë
akt Zoja e Bekuar bëhet modeli i gjithë atyre të cilët, aty e mbrapa, do t’i kushtohen
Zotit me jetën rregulltare. Prandaj sot, në përkujtimin liturgjik të Paraqitjes
së Zojës së Bekuar në tempull, Kisha kremton edhe Ditën kushtuar rregulltareve të
klauzurës, për të cilat Papa foli në lutjen e Engjëllit të Tënzot, duke theksuar se
kuvendet e motrave kundruese i tregojnë botës së sotme se arsyeja kryesore për të
cilën ia vlen të jetosh, është Hyji dhe dashuria e tij e pashqyrtueshme”. Kuvendet
e jetës kundruese u ofrohen njerëzve si oaza të Shpirtit e u bëjnë mirë të gjithëve.
Maria, që paraqitet në tempull, është ikonë profetike e atyre që dhurojnë jetën për
lavd e lumni të Zotit e për kthimin e zemrave, përmes kushteve rregulltare. Kisha
i shpreh mirënjohjen Zotit për këtë dhuratë dhe i kushton vëmendje të veçantë manastireve,
posaçërisht atyre që kalojnë çaste të vështira. Gjatë Ditës kushtuar rregulltareve
të klauzurës, themeluar nga Piu XII më 21 nëntor 1953, besimtarët luten për ato që
ia kushtojnë gjithë jetën kundrimit, duke bashkëpunuar në këtë mënyrë për ndërtimin
e mbretërisë së Hyjit. Zgjedhja e rrugës kundruese nuk është e rastit: buron nga dashuria
e thellë, pa kushte, për Krishtin dhe nga dëshira për të marrë pjesë shpirtërisht
në problemet e Kishës e të botës. Shembulli i murgeshave mund të kthehet në forcë
tërheqëse e t’i japë hov ecjes në gjurmët e Krishtit, që kërkohet nga çdo i pagëzuar. Kjo
Ditë u kujton gjithë të krishterëve se Krishti duhet të jetë në qëndër të jetës së
tyre, se duhet të luten e të dëgjojnë fjalën e Zotit, për ta jetuar plotësisht fenë
e tyre. Kujtojmë se, sipas statistikave më të reja, në të pesë kontinentet numrohen
51 mijë rregulltare kundruese, që jetojnë në 3. 600 kuvende.