Papa thirrje solidariteti për popullsitë e Bangladeshit
(19.11.'07RV)Papa Benedikti XVI shpreh afërsinë e solidaritetin me popullsitë
e Bangladeshit të goditur nga cikloni Sidr. Dje gjatë lutjes së Engjëllit të Tenzot
në mesditë, në Sheshin e Shën Pjetrit në Vatikan, Papa i bëri thirrje bashkësisë ndërkombëtare,
të ndihmoj ata persona që janë goditur nga kjo fatëkeqësi natyrore që ka shkaktuar
vdekje e shkatërrime të pallogaritshme: “Bëj thirrje për solidaritet ndërkombëtar,
i cili tashmë është vu në lëvizje për t’i bërë ballë nevojave të menjëhershme që ka
popullsia e Bangladeshit. Inkurajoj ndërmarrjet e çdo përpjekjeje në ndihmë të këtyre
vëllezërve që janë kaq rëndë të sprovuar “. Para apelit për Bangladeshin, Papa
Racinger u ndal për një reflektim mbi pjesën e ungjillit të së dielës, që na referon
për thirrjen që Jezusi i drejton nxënësve të vet të mos kenë frikë, por t’i përballojnë
me guxim e besim moskuptimet, vështirësitë e perndjekjet. Qysh në fillim, tha Ati
i Shenjtë Benedikti XVI, Kisha “jeton duke pritur në lutje Zotërinë e vet, duke shqyrtuar
shenjat e kohërave e duke tërhequr vëmendjen e besimtarëve të ruhen nga mesianizmat
e rrjeshëm që paraqiten duke paralajmëruar mbarim e botës: “Në realitet, historia
duhet ta bëjë rrjedhën e vet, që sjell edhe drama njerëzore e fatëkeqësi natyrore.
Në to zhvillohet plani i shpëtimit të cilit Krishti i ka dhënë plotësimin në mishërimin,
vdekjen e ngjalljen e vet. Këtë mister Kisha vazhdon ta kumtojë e ta zbatojë me predikime,
me kremtime të sakramenteve e me dëshmi të dashurisë e të bamirësisë”. “Nuk
frikohemi për të ardhmen”, vijoi Papa, “edhe pse ajo mund të na duket me ngjyra të
zymta, sepse Zoti i Jezu Krishtit që e ka marrë mbi vete historinë për ta hapur drejt
plotësimit trashendental” është “fillimi e mbarimi” i historisë dhe i jetës njerëzore. “Ai
na garanton se në çdo gjest të vogël por të pastër të dashurisë është i tërë kuptimi
i gjithësisë, e kush nuk heziton ta humbas jetën e vet për Të, e gjen atë në plotësi”. Në
vazhdim të reflektimit para Lutjes së Engjëllit të Tenzot dje Papa Benedikti XVI e
përmendi Lumnimin e figurës së ndritshme të katolicizmit italian Antonio Rozminit
që u bë dje pasdite në Novara të Italisë nga Prefekti i Kongregatës së Vatikanit për
Cështjen e Shenjtorëve, kardinali Zhozé Saraiva Martìns. Duke folur për tiparet e
këtij meshtari e njeriu të kulturës, “i frymëzuar nga dashuria për Zotin e për Kishën”,
Papa mes tjerash tha: “Ai dëshmoi virtytin e dashurisë në të gjitha përmasat
e saj e në nivelin më të lartë, por ajo që e bëri më shumë të njohur qe impenjimi
i tij bujar për atë që Rozmini e quante “dashuria intelektuale”, që do të thotë përkimi
e pajtimi i aryses me fenë. Shembulli i tij e ndihmoi Kishën, posaçërisht bashkësinë
kishtare italiane, të rritej në vetëdijen se drita e arsyes njerëzore dhe ajo e Hirit
Hyjnor, kur ecin së bashku, bëhën burime bekimi për personin njerëzor e për mbarë
shoqërinë”. Një tjetër argument që Papa Benedikti XVI përmendi në vazhdim të
reflektimit para Lutjes së Engjëllit të Tenzot është edhe shembulli i dashurisë së
personave të përkushtuar e të shuguruar të jetës rregulltare, në mënyrë të posaçme
ata që janë të thirrur nga Zoti në udhën e kundrimit nëpër kuvende të klauzurës. E
pikërisht atyre, Kisha ua kushton një Ditë të posaçme më 21 nëntor, për të ripohuar
se kuvendet murgare janë oaza spiritualiteti që na tregojnë se Zoti dhe dashuria e
tij Hyjnore janë arsyet e mbrame për të cilat ja vlenë të jetosh deri në fund të jetës.
Fjalë këto që na ftojnë të ndalemi e të mendojmë mbi forcën e dashurisë së krishterë: “Feja që vepron në dashuri është ilaçi i vërtetë kundër mentalitetit nihilist,
që në epokën tonë po përhapet gjithnjë më tepër me ndikimin e vet në botë”. Së
fundi Papa nuk mungoi pa përmendur edhe Asamblenë e Shteteve që kanë nënshkruar Marrëveshjen
kundër minave që janë kundër njeriut, punimet e së cilës filluan dje në Jordani. Selia
e Shenjtë, kujtoi Papa, është ndër nismëtaret kryesore të kësaj Marrëveshjeje. E kështu
Ati i Shenjtë shprehi urimet dhe mbështetjen e tij për arritjen e rezultate të mira
të kësaj konference, “në mënyrë që nga këto armë, që vazhdojnë të mbjellin viktima,
ndër to edhe fëmijë, të ndalohen plotësisht”. Së fundi, duke përshendetur shtegtarët
e gjuhës franceze, Papa kutjoi se dje binte Dita Ndërkombëtare kundër aksidenteve
rrugore. E këtu Benedikti XVI kërkoi të “dyfishohen përpjekjet për të ndihmuar shoferat
të jenë të matur e të kujdesshëm, kështu që ta mbrojnë jetën personale dhe atë të
tjerëve”.