Në Parlamentin evropian – një Rezolutë mbi persekutimin e të krishterëve në botë.
(15.11.2007 RV)“Episode të rënda vënë në rrezik ekzistencën e bashkësive të
krishtera dhe të bashkësive të tjera në Lindjen e Mesme e në vise të ndryshme të botës:
kështu shkruhet në tekstin e Rezolutës që u paraqit sot pasdite në Parlamentin evropian,
me nismën e zevendës-kryetarit të europarlamentit, Mario Mauro. Në tekst kujtohen
episode të shumta, duke filluar nga persekutimet, tek vrasjet e tek situata e shpërnguljes
në masë për shkak të gjendjes krejt të pasigurtë për jetën. E nuk janë të pakta vendet
që jetojnë në situata të tilla: nga Gaza në Filippine; nga Iraku, në Pakistan; nga
Turqia në Sudan. Por, ta dëgjojmë vetë autorin e nismës, të nderuarin Mario Mauro,
në mikrofonin e Radios sonë:
Përgjigje: - Nga seria e gjatë, pothuajse
e pafundme e tragjedive dhe e tmerreve që na tronditën thellë gjatë vitit 2007, mundem
të vërejmë se jeta e shumë njerëzve në vende të ndryshme të botës vihet në rrezik
thjeshtë për shkak të fesë së tyre. Nga ky fakt buron shqetësimi i jashtëzakonshëm
i institucioneve që ia kanë kushtuar jetën betejës për mbrojtjen të drejtave të njeriut.
Ky është edhe kuadri në të cilin radhitet përpjekja për të propozuar një rezolutë,
që fitoi mbi kundërshtimet tipike të ‘politikës korrekte’, e cila është e gatshme
të luftojë për të gjitha tipet e pakicave, përveç atyre që në një farë mënyre të kujtojnë
epitetin ‘kristiane’. Ndërsa ka rëndësi të madhe fakti që mendimet e shumë grupeve
përkuan me tekstin që propozuam, gjë që flet vetë për përfundime pozitive.
Pyetje:
- Ç’i kërkon konkretisht ky tekst institucioneve evropiane?
Përgjigje:
- Mbi të gjitha, të njohin nga afër gjendjen. E kjo nuk është gjë e paktë, Rezoluta
ka një tekst mjaft të gjatë, pikërisht sepse hyjmë në hollësira e shpjegojmë rastet
konkrete të shkeljes së të drejtave të njeriut, episodet e rënda e sistematike, të
cilat i vënë në rrezik bashkësitë e krishtera. Në radhë të dytë, në një fragment të
tekstit, kërkojmë që në vijën e bilancit e në vënien në jetë të programeve të donacionit
të Bashkimit Evropian – kujtoj se Evropa është donatori më i madh në botë – të kihet
parasysh që ndihmat për vendet nevojtare, të jepen në përkim me respektimin e pranisë
së pakicave në këto vende.
Pyetje: - Zoti zevendës – kryetar, viti
2008 ka trokitur tashmë te porta e Bashkimi Evropian dëshiron të jetë vit ndërkulturor:
jemi duke u përgatitur për këtë?
Përgjigje: - Kjo rezolutë është sadopak
një mjet, i cili besoj se do të na ndihmojë të përgatitemi më mirë për dialogun ndërkulturor.
Lëmë të kuptohet kështu se do t’i ndjekim nga afër vuajtjet mes të cilave, për fat
të keq, jeton njeriu i kohës sonë, por edhe se mbi bazën e këtyre vuajtjeve mund të
arrijmë tek një solidaritet më i madh, i cili na bashkon në një rrugë, ku është e
mira që të gjithë njerëzit të ecin së bashku.