Arkivi tepër i pasur i Gjon Sinishtës, nxënës i jezuitëve, do të niset së shpejti
për në Shqipëri.
(15.11.2007 RV)Lajmin e solli në
redaksinë tonë Rejmënd Frast, drejtor i Institutit Katolik ‘Danjel Dajani’ pranë Universitetit
të San Franciskos në Kaliforni, një nga bashkëpunëtorët më të ngushtë të Sinishtës,
i cili gjatë gjithë periudhës së diktaturës nxori në Amerikë, revistën ‘Buletini katolik”,
që sensibilizoi opinionin publik botëror mbi persekutimin fetar në Shqipëri. Shkrimet
më të mira të revistës u përmblodhën në librin “The fulfilled Promise (Premtimi i
përmbushur”); A Documentary Account of religious persecution in Albania” – vepër e
hartuar nën kujdesin e Gjon Sinishtës, botuar në Santa Clara, California, USA më 1976,
që denoncon, përmes dëshmive, shkeljen e të gjitha të drejtave dhe lirive, pra edhe
lirisë së fesë, në Shqipëri. Si revista, ashtu edhe libri, janë nxjerrë nga arkivi
tepër i pasur i Gjon Sinishtës. Ja ç’na thotë Rejmënd Frast për të: Përgjigje:
- Mund të them se e kemi përgatitur arkivin, i cili është shumë i pasur me letra,
dokumente, fotografi, dëshmi, regjistrime. Arkivi u ruajt gjithnjë në Universitetin
e San Franciskos; tani do të niset për në Shqipëri. Do t’u besohet etërve jezuitë,
që do të kujdesen për ruajtjen edhe shfrytëzimin e tij nga ana e studiuesve dhe personave
të tjerë, që kanë interes ta shfletojnë. Kemi menduar që arkivi të ruhet në Shkodër,
ku pushon në paqe edhe trupi i Gjonit.
Pyetje: - Pse pikërisht në
Shkodër? Përgjigje: - Menduam... e edhe familja – që, ashtu si pushon
në paqe në Shkodër, atje të ruhet edhe arkivi. E kjo sepse martirët e fesë së krishterë
janë atje, e Gjoni ishte gjithë jetën dëshmitar i tyre. Isha në Shkodër kur u varros
në praninë e një turme të jashtëzakonshme miqsh e dashamirësh, që e përshëndetën vullnetin
e tij të fundit për të pushuar në atë varrezë të lumnueshme, ku shumë vorre i përngjasin
elterëve. Tani edhe Arkivi do të vendoset në një vend po aq të lumnueshëm, në ish-Kolegjen
Saveriane të etërve jezuitë, ku pati studiuar Gjoni.