Ngushëllimet e Papës për vdekjen e kardinalit japonez Stefen Fumio Hamao.

(09.11.2007 RV)Kardinali japonez Stefen Fumio Hamao, kryetar nderi i Këshillit Papnor për baritorinë e emigrantëve dhe endacakëve, 77 vjeç, vuante prej kohe nga një tumor, që i shkaktoi edhe vdekjen. Salikimet do të kremtohen të hënën, më 12 nëntor, në Jokohama.
Papa Benedikti XVI, përmes një telegrami drejtuar familjarëve, shprehu hidhërimin e tij të thellë për humbjen e kardinalit Hamao, por edhe mirënjohjen për veprimtarinë e devoçme të Hirësisë së Tij në shërbim të Ungjillit, të të varfërve e të Kishës Universale. Ia besoj mëshirës hyjnore – shton Ati i Shenjtë - shpirtin e këtij biri, me të cilin krenohet edhe popullit japonez.
Ngushëllime për vdekjen e kardinalit shprehu edhe ambasada japoneze pranë Selisë së Shenjtë. Kardinali Hamao – lexohet në një komunikatë – punoi me zell të madh në favor të emigrantëve, duke dhënë kontributin e tij të çmuar në këtë fushë kaq të rëndësishme për gjithë bashkësinë ndërkombëtare. Mbetet domethënës- lexohet akoma në komunikatë - kontributi i tij në marrëdhëniet ndërmjet Selisë së Shenjtë e Japonisë.
I lindur në Tokio, kardinali Hamao u diplomua Drejtësi Kanonike pranë Universitetit Gregorian në Romë. U shugurua meshtar në moshën 27 vjeçare e më pas u bë ipeshkëv ndihmës i Tokios e i Jokohamës. Më 1995 ishte Kryetar i Konferencës Ipeshkvnore të Japonisë; më 1998 Gjon Pali II e emëroi kryetar i Këshillit Papnor për emigrantët dhe endacakët, ndërsa më 2003 e krijoi kardinal.Emri i kardinalit të ndjerë nuk është i panjohur për shqiptarët: ai jo vetëm dha një ndihmesë të shquar për një vend emigrantësh si Shqipëria, por edhe e vizitoi vendin tonë, për të njohur nga afër shkaqet që vijojnë t’i shtyjnë njerëzit ta braktisin në kërkim të një jete më të mirë.