Kryeministri i Kosovës në Itali. Takohet me D'Alemën.
(07.11.07 RV)Kryeministri i Kosovës, Agim Çeku ndodhej sot në Romë, ku është
takuar me Ministrin e jashtëm italian, Masimo D’Alema. Menjëherë pas takimit serbo-kosovar
në Vjenë, Çeku vjen në Itali në kuadrin e krijimit të konsensusit për njohjen eventuale
të pavarësisë së njëanshme të Kosovës. Pikërisht sot, D’Alema foli për çështjen kosovare
me senatorin Françesko Kosiga. Ky i fundit deklaroi se çështja kryesore për Romën,
është se ç’do të bëhet me kontingjentin italian të KFOR-it në rast se Prishtina shpall
pavarësinë e serbët reagojnë. Ndërkaq, dje, Agim Çeku u shpreh me tone pesimiste
për një marrëveshje të mundshme mbi statusin, në një intervistë për gazetën austriake
“Der Standard”. Serbia flet për të shkuarën, deklaron ai, duke sqaruar se e vetmja
gjë që i ka kërkuar tani Beogradit është “që të merremi vesh për të mos qenë dakord
mbi statusin”. Qëllimi i Prishtinës, sipas Çekut, është shpallja e pavarësisë brenda
vitit. Nga ana tjetër, ndërsa kryeministri i Kosovës ndodhet në Romë, ministri
i jashtëm serb Vuk Jeremiç u takua në Berlin me homologun gjerman, Valter Shtajnmajer.
Sipas këtij të fundit, koha për të gjetur një zgjidhje të negociuar për statusin e
Kosovës po përfundon. Jeremiç premtoi se Beogradi do të bëjë ç’është e mundur për
të arritur në një përfundim të kënaqshëm të bisedimeve deri më 10 dhjetor.
Shqipëria
duhet të luftojë korrupsionin dhe të kryejë reformën në drejtësi. Është ky qëndrimi
i presidentit të Parlamentit Europian, Hans-Gert Pëtering, i cili u takua sot në Bruksel
me kryetaren e Kuvendit të Shqipërisë, Jozefina Topalli. Gjithashtu, Pëtering shprehu
mbështetjen e parlamentit për integrimin e Shqipërisë në strukturat e Bashkimit Evropian
dhe u shpreh për zgjidhje paqësore të problemeve në rajonin e Ballkanit.