Papa: “Shkenca të jetë gjithnjë në shërbim të dinjitetit të njeriut”.
(06.11.2007 RV)Në ndjetin e përgjithshëm
të uratës për muajin nëntor, Papa u kërkon besimtarëve të luten për njerëzit që i
kushtohen kërkimit shkencor në fushën e mjekësisë si dhe për ata që merren me veprimtari
ligjore, me qëllim që të thellohet gjithnjë më shumë respekti për jetën njerëzore
nga zanafilla e saj e deri në përfundimin e natyrshëm. E pikërisht mbrojtjes së njeriut
e të dinjitetit të tij, Ati i Shenjtë i kushton shumë fjalime magjisteriale: Shkenca
nuk duhet të përdoret kurrë kundër jetës dhe dinjitetit të njeriut, por gjithnjë në
shërbim të tyre. Benedikti XVI e kujton pacenueshmërinë e këtij parimi që në fillimet
e papnisë së tij. Mbrojtja e jetës nuk është interes katolik, por shërbim që i bëhet
njeriut - thekson me forcë Papa, duke folur në Takimin e Kishës Katolike Italiane,
më 30 maj 2005, ndërsa në Itali ishte ndezur diskutimi rreth ligjit 40 mbi lindjen
e asistuar. “Këtu nuk punojmë për interesa katolike, por gjithnjë për njeriun,
krijesën e Zotit”. Kisha nuk është armike e shkencës – ripohon Ati i Shenjtë
dhe, duke i folur ambasadorit britanik më 23 dhjetor 2005, i tërheq vemendjen mbi
problemet etike që lindin gjatë progresit shkencor e teknologjik, posaçërisht në fushën
kërkimore mjekësore. Më 27 shkurt 2006, pastaj, duke pritur në audiencë anëtarët e
Akademisë Papnore për Jetën, Benedikti XVI kujton se “Zoti nuk bën dallim ndërmjet
jetës që ka dalë në dritë e asaj që nuk ka lindur endè, sepse që të dyja mbajnë në
vetvete shenjën e atësisë së tij, mendim që Kisha e ka mbrojtur gjithnjë”. “Jeta
njerëzore dhe ligjet që e sundojnë janë një mister në të cilin inteligjenca njerëzore
mund të depërtojë deri në një farë pike. Përtej këtij pragu nis ‘aventura e së mbinatyrshmes’,
që gjen përgjigje tek besimi në Zotin e tek Shkrimi Shenjt, në faqet e të cilit është
shkruar gjithë dashuria e Zotit për çdo qenie njerëzore, shumë kohë përpara se të
marrë trajtë në kraharorin e nënës”. Duke u folur punonjësve shkencorë dhe studiuesve
të gjenetikës, Benedikti XVI nënvizon lidhjen ndërmjet kërkimit shkencor dhe reflektimit
etik. Bëhet fjalë – reflekton Papa – për një argument mahnitës e njëkohësisht, të
vështirë dhe impenjativ, për të cilin as Shkrimi Shenjt e as Tradita e krishterë
nuk mund të përmbajnë shtjellime të qarta. Megjithatë – vëren më pas: “Magjisteri
i Kishës ka shpallur vazhdimisht karakterin e shenjtë e të padhunueshëm të çdo jete
njerëzore, që nga zënia e deri në fundin e saj të natyrshëm. Ky gjykim moral vlen
që në fillimet e jetës së një embrioni, që para se të zërë vend në kraharorin e nënës,
e cila do ta ruajë e do ta ushqejë për nëntë muaj, deri në çastin kur do të dalë në
dritë: Jeta njerëzore është e shenjtë dhe e padhunueshme në çdo çast të ekzistencës
së saj, edhe në çastin fillestar, që i paraprin lindjes”. Njeriu, i krijuar sipas
planit të Zotit, nuk mund të shndërrohet kurrë në mjet. Papa merret me çështjen antropologjike
gjatë një fjalimi, mbajtur më 1 prill 2006, në audiencën me përfaqësuesit e Kongregatës
për Edukimin Katolik: “Duhet theksuar me forcë se njeriu nuk mund e nuk duhet
flijuar kurrë për sukseset e shkencës e të teknikës: ja pse riduket me gjithë rëndësinë
e vet, e ashtuquajtura çështje antropologjike të cilën ne, trashëgimtarët e një tradite
humanistike, themeluar mbi vlerat e krishtera, duhet ta përballojmë në dritën e parimeve
frymëzuese të qytetërimit tonë”. Benedikti XVI ndalohet përsëri tek vlera e vërtetë
e progresit shkencor në audiencën me Akademinë Papnore të Shkencave, më 6 nëntorin
e kaluar: "Njeriu – kujton Papa - nuk mund të ketë një besim kaq rrënjësor
e të pakushtëzuar në shkencën dhe në teknikën, sa të besojë se progresi shkencor e
teknologjik mund të shpjegojë gjithçka e t’i realizojë plotësisht nevojat e tij shpirtërore
e jetësore. Shkenca nuk mund t’u japë përgjigje shterruese pyetjeve më bazale të njeriut
mbi kuptimin e jetës e të vdekjes, mbi vlerat e fundit e mbi vetë natyrën e progresit". Mbi temën e kërkimeve shkencore Papa reflekton edhe në fjalimin drejtuar Trupit
Diplomatik të akredituar pranë Selisë së Shenjtë më 8 janar të vitit në vijim, duke
nënvizuar rreziqet që lindin nga zhvillimi i një shkence që nuk njeh rregulla: “Format
e sulmit kundër jetës – pohon Papa – nganjëherë marrin pamjen e kërkimit shkencor.
Shikohet kështu si diçka normale aborti, relativizimi i familjes së themeluar mbi
martesën dhe prirja për ligjërimin e klonimit njerëzor, me pretekstin e zhvillimit
shkencor, që kërkon të imponojë vetëm ligjet e veta”. Së fundi, duke u folur
farmacistëve katolikë, të hënën më 29 tetorin e kaluar, Benedikti XVI ngre përsëri
zërin në mbrojtje të dinjitetit të njeriut, sidomos të të sëmurit: “Asnjë njeri
– pohon Papa - nuk mund të përdoret si objekt për realizimin e eksperimenteve
terapeutike; ato duhen bërë sipas protokolleve që respektojnë normat etike themelore,
gjithnjë në perspektivë të mirëqenies së njeriut e jo thjeshtë të progresit shkencor”.