“Apostull i palodhshëm i dashurisë së krishterë” – vdiq në moshën 82 vjeçare, don
Oreste Benzi. Ngushëllimi i Papës.
(02.11.2007 RV)Sot, rreth orës dy të mëngjesit, vdiq papritur nga një goditje
në zemër, don Oreste Benzi, meshtari 82 vjeçar romanjol, themelues i Shoqatës ‘Papa
Gjoni XXIII’, i cili 35 vjet me radhë ishte në vijën e parë të frontit të veprimtarisë
për asistencën e shtresave më të varfra të popullsisë në mbarë botën, me 200 shtëpi-familje
e më se 30 bashkësi mjekuese për rikthimin në jetë të të droguarve. Në një telegram
nënshkruar nga sekretari i Shtetit të Vatikanit, kardinali Tarçizio Bertone, Benedikti
XVI shpreh dhimbjen e tij për humbjen e don Benzit, të cilin e kujton si apostull
të palodhshëm të dashurisë së krishterë, me një jetë të thellë baritore, shkrirë për
njerëzit më të varfër, më të braktisur, më të pambrojtur, e si meshtar që mori mbi
vete problemet më të rënda shoqërore, të cilat i hapin plagë të thella botës së sotme. E
kujtojmë këtë meshtar të kishës katolike, sepse emri i tij nuk është i panjohur për
shqiptarët, sidomos për shumë gra e vajza, edhe të mitura, të flakura pikërisht nga
bashkatdhetarët e tyre në rrugën e prostitucionit. E kur kërkuan një vëlla, një mik,
një strehë që t’i shkëpuste nga rruga e zvetënimit, nuk e gjetën tek bashkatdhetarët,
por tek një meshtar katolik, që u zevendësoi prindërit, vëllezërit e motrat e u doli
krah, duke rrezikuar veten, përballë kriminelëve të një gjaku. Madje nuk u mjaftua
me kaq: u nis edhe për në Shqipëri, për t’i njohur nga afër shkaqet që i shtyjnë
qindra vajza e gra shqiptare të rrezikojnë korp e shpirt, duke bredhur në kërkim të
mirazhit të një jete më të mirë rrugëve, ku i pret vdekja. Ky ishte për shqiptarët
don Benzi, në shtëpitë e të cilit, edhe tani që nuk është më, gjejnë strehë shumë
vajza e gra shqiptare, sepse për fat të keq, flakja e tyre në rrugë vijon!