Imzot Miliore: mbrojmë jetën në tërësi, duke iu kundërvënë abortit, eutanazisë e dënimit
me vdekje.
(02.11.2007 RV)Në Pallatin e Qelqit
në Nju Jork vijojnë punimet e Asamblesë së përgjithshme të Kombeve të Bashkuara. Merr
pjesë edhe kryeipeshkvi Çelestino Miliore, vëzhgues i përhershëm i Selisë së Shenjtë
pranë OKB-së. Gjatë një interviste telefonike, dhënë nga Nju Jorku, e pyetëm:
Pyetje:
- Imzot Miliore, këto ditë keni nënvizuar disa herë faktin se paqja nuk mund të
sigurohet, në se nuk ecet në rrugën e detyrueshme të respektimit të të drejtave
të njeriut. E ndërmjet tyre, themelore është e drejta e lirisë fetare, e mohuar në
shumë shtete…
Përgjigje: - Po. Faktikisht, çështja e dialogut ndërfetar
e ndërkulturuor ndjehet shumë këto ditë në Kombet e Bashkuara; e është mirë që ngjet
kështu, pikërisht sepse ky dialog është mjet e mënyrë për të siguruar atë paqe,
atë bashkëjetesë paqësore që e dëshirojmë të gjithë. Por, duhet të jetë dialog që
niset ‘nga’ e arrin ‘në’ një respekt e në një promovim më të madh të së drejtës së
lirisë fetare.
Pyetje: - Ju keni folur kryesisht për ligjet mbi blasfeminë,
duke i parë si shkaktare të shumë vuajtjeve…
Përgjigje: - Po, sigurisht,
ashtu janë. Ajo që kërkojmë e që besojmë se përkon me respektimin e dinjitetit të
njeriut, është të rregullohen këto çështje e, mbi të gjitha, njerëzit e akuzuar për
blasfemi, të trajtohen duke respektuar të drejtat e tyre. E kjo, sepse shpesh atyre
u mohohet e drejta e një procesi të rregullt, ndërsa janë para dënimit me vdekje,
dënim tepër i rëndë. Prandaj kërkojmë respekt shumë më të madh për njerëzit e akuzuar
si blasfemë.
Pyetje: - Keni bërë thirrje edhe për respektimin e së
drejtës së njeriut për të jetuar nga zënia deri në vdekjen e natyrshme…
Përgjigje:
- Çështja e dënimit me vdekje mund të kuptohet, mund të mendohet vetëm në kontekstin
e së drejtës për jetën, e e drejta për të jetuar nis nga zënia e shkon deri në fund
të jetës. Prandaj, kur respektohen të gjitha fazat e jetës, mund të zgjidhet shumë
më mirë edhe çështja e dënimit me vdekje.