Kryeprokurori i Shqipërisë nuk paraqitet në komisionin "Sollaku 2" e lajme të tjera
(29.10.2007 RV)Kryeprokurori i Shqipërisë, Theodhori Sollaku nuk u paraqit
sot në Komisionin hetimor “Sollaku 2”. Përmes një letre dërguar zyrës së Kuvendit,
kreu i organit te akuzës pretendon se komisioni po shqyrton konkluzione e jo faktet
që mund të çojnë në shkarkimin e tij. Sollaku shkruan se nuk i është vënë në dispozicion
asnjë material, që përmban faktet, objekt i hetimit të komisionit, e si rrjedhojë
nuk mund të mbrohet. Sollaku ka premtuar të paraqitet, në momentin kur do të ketë
në dorë faktet. Gjithashtu, nuk ishin të pranishëm deputetët e opozitës, për të cilët
mbledhja e komisionit është antikushtetuese. Seanca e ardhshme do të zhvillohet nesër.
Ushtria
turke ka rrethuar sot njëqind rebelë kurdë në një zonë malore në kufirin juglindor
turk, pranë Irakut dhe Iranit. Duke mos mundur të kthehen mbrapsht, kurdët janë fshehur
nëpër male, nga ku ushtria po mundohet t’i nxjerrë. Ndërkaq, në Tunçeli, në Turqinë
qendro-lindore, një ushtar turk humbi jetën nga shpërthimi i një mine. Në zonë ndodhen
8 mijë ushtarë turq, të cilët marrin pjesë në operacione ushtarake. Bagdadi e konsideron
të rëndësishme krizën me Turqinë, ndërsa SHBA kanë deklaruar se Ankaraja ka të drejtë
të kërkojë ushtarët e rrëmbyer nga kurdët, por nuk duhet të shkojë më tej. Në Irak,
në dy atentate të ndryshme janë vrarë 32 vetë, ndër të cilët 28 policë.
Kryeministri
izraelit Ehud Olmert është i sëmurë me tumor, por ka ndërmend të vazhdojë të qëndrojë
në detyrë. Pas disa muajsh do t’i nënshtrohet një operacioni mjekësor.
Argjentina
ka një presidente grua. Është kandidatja e Frontit për Fitoren, 54 vjeçarja Kristina
Fernandez Kirhner, e cila më 10 dhjetor do të zërë vendin e të shoqit, Nestor Kirhner.
Presidentja e re mori 44,7% të votave. Pjesëmarrja në votime ka qenë më e ulta pas
rikthimit të demokracisë, më 1983. Në zgjedhje morën pjesë vetëm 74,11% e votuesve.