Serbia sulmon Lajçak në Bosnjë dhe kërcënon për shkëputjen e Republikës serbe
(26.10.2007 RV)Frika se Serbia do të largohet nga përpjekjet për anëtarësim
në Bashkimin Evropian në këmbim të një aleance më të fuqishme me Rusinë është e pabazë,
deklaroi Ministri i jashtëm serb, Vuk Jeremiç për agjensinë e lajmeve Rojters. Rusia
mbetet një aleate e rëndësishme e Serbisë, por Beogradi sheh drejt Evropës. “Kemi
zgjedhjet presidenciale në dhjetor dhe është e rëndësishme të zgjedhim rrugën evropiane”
– vazhdoi Jeremiç, duke iu referuar presidentit aktual Boris Tadiç, i cili kandidohet
për herë të dytë. “Do të jetë si një referendum” përfundoi Ministri i jashtëm serb. Ndërkaq,
kryeministri Vojisllav Koshtunica është i zënë në debate me përfaqësuesin e OKB-së
për Bosnjën, Miroslav Lajçak. Ky i fundit, i mbështetur edhe nga sekretari i përgjithshëm
i OKB-së, ka vendosur rregulla të reja për marrjen e vendimeve në parlament e në qeveri,
të cilat mundohen të evitojnë hedhjen poshtë të ligjeve vetëm për mungesën e deputetëve
dhe të ministrave në sallë. Metoda e mungesës është përdorur shpesh nga përfaqësuesit
e Republikës serbe të Bosnjës, të cilët protestojnë tani kundër normave të reja të
sllovakut Lajçak. Kanë gjetur mbështetjen e plotë të Koshtunicës, i cili e ka akuzuar
përfaqësuesin ndërkombëtar se po punon kundër interesave të popullit serb dhe nuk
respekton marrëveshjen e Dejtonit. Komentet e Koshtunicës janë kritikuar nga dy presidentë
kolegjialë të Bosnjë-Hercegovinës, nga ai mysliman, Haris Silajxhiq dhe nga ai kroat,
Zheljko Komsiq. Përballë kësaj situate dhe në kuadrin e diskutimeve për statusin
e Kosovës, ultranacionalistët serbë, të udhëhequr nga Tomislav Nikoliq, ngrenë zërin
për të kërcënuar bashkësinë ndërkombëtare. Nëse do t’i jepet pavarësia Kosovës, sipas
Nikoliqit, edhe serbët e Republikës serbe të Bosnjës duhet të kenë të drejtën e referendumit
për t’u shkëputur nga Bosnjë-Hercegovina.