U paraqit në Vatikan vëllimi me pergamenat në faksimile që lidhen me procesin e Templarëve.
(25.10.2007 RV)Sot paradite, gjatë një konference shtypi pranë Sallës së Vjetër
të Sinodit në Vatikan, u paraqit vëllimi ‘Procesi kundër Templarëve’, i përbërë nga
pergamenat në faksimile, apo kopjet e pergamenave, që lidhen me procesin e Templarëve
zhvilluar nën papninë e Klementit V në shekulli XIV. Pergamenat origjinale ruhen në
Arkivin Sekret të Vatikanit. Në konferencën e shtypit ishin të pranishëm imzot
Rafaele Farina, arkivist e bibliotekar i Kishës së Shenjtë Romake; imzot Sergjo Pagano,
prefekt i Arkivit Sekret të Vatikanit e shumë zyrtarë e studiues, që kanë lidhje të
ngushtë me të dy institucionet e Vatikanit.Vëllimi ka një rëndësi të madhe për të
sqaruar ngjarjet që e shtynë papën Klementi V t’i nxirrte të pafajshëm Templarët,
të akuzuar për herezi. Papa e pezulloi Urdhërin, pa e shpërndarë, duke ripërfshirë
dinjitarët e lartë Templarë e me ta, edhe krejt Urdhërin, në bashkimin e në sakramentet
e Kishës. Libri sqaron gjithë ngatërresat historike të kohës kur Filipi i Bukur i
Francës, ndeshej me Anglinë, ngatërresa të cilat e çuan Urdhërin e Templarëve në akuza
të rënda më parë, e më pas në tortura e në shkatërrim të ngadalshëm ekonomik e organizativ,
që nisi me mbytjen e Mjeshtrit të Madh të Urdhërit, Zhak de Molei dhe të dinjitarëve
të tjerë. Dokumentet e botuara i japin në dorë lexuesit të vërtetën historike, të
shkruar në pergamena që, po të mos ishin ruajtur, do të ishin grirë nga koha e nga
lagështira. E kjo e vërtetë është pa dyshim shumë më interesante sesa legjenda.