(25.10.2007 RV)Në mesnatë fillon fushata elektorale në Kosovë për zgjedhjet
e 17 nëntorit. Shumica e partive politike kanë paraqitur si program përparësor pavarësinë
e Kosovës dhe zhvillimin ekonomik. Pak ditë më parë, me nismën e presidentit Fatmir
Sejdiu, subjektet politike kanë nënshkruar një deklaratë me të cilën zotohen për një
fushatë korrekte dhe dinjitoze. Gjithsej, janë paraqitur në zgjedhje 97 subjekte.
1 milion e gjysëm qytetarë të Kosovë kanë të drejtën e votimit.
Qëndrimet
e ndryshme përsa i përket statusit të Kosovës dhe planet amerikane për të instaluar
raketa në Evropën Lindore ishin sot në qendër të bisedimeve ndërmjet Ministrit rus
të Mbrojtjes, Anatoli Serdjunkov dhe homologëve të tij në NATO, të mbledhur në Hollandë.
Diskutimet vijnë menjëherë pasi sekretari amerikan i Mbrojtjes, Robert Gejts deklaroi
se Uashingtoni mund ta shtyjë aktivizimin e mbrojtjes kundër raketave në Poloni dhe
në Republikën Çeke. Përsa i përket Kosovës, NATO ka vendosur tashmë që të mos e reduktojë
forcën e vet, të disllokuar në vend. Kosova ishte sot argument bisede edhe ndërmjet
kryeministrit italian, Romano Prodi dhe atij austriak, Alfred Gusenbauer, për vizitë
në Romë. Prodi deklaroi se Italia dhe Austria mbështesin çdo përpjekje që çon në një
marrëveshje ndërmjet palëve. Nga ana tjetër, ministri i jashtëm slloven, Dimitrij
Rupel, i cili ndodhej sot për vizitë në Kosovë, premtoi se do të punojë për unitetin
e Evropës në momentin kur të kërkohet një qëndrim i përbashkët për Kosovën. Sllovenia
do të marrë në dorë presidencën e Bashkimit Evropian, duke filluar nga 1 janari i
vitit që vjen. Spanja, Greqia, Rumania dhe Qipro kanë shprehur rezerva për njohjen
e pavarësisë së Kosovës, pasi kanë lëvizje separatiste brenda vendit, që mund të marrin
shembull nga Prishtina.