Zvicra nuk duhet t’ua mbyllë dyert të huajve dhe Evropës: kështu shprehet ipeshkvi
i Luganos pas suksesit të së djathtës ksenofobe në votime.
(23.10.2007 RV)Pas fitores të së
djathtës së Kristof Blosher, Zvicra duhet të mendojë për të ardhmen e vet e për marrëdhëniet
me Bashkimin Evropian. Ndërsa e djathta njihet si ksenofobe, shoqatat kryesore të
ndërmarrjeve helvetike kanë nënvizuar rëndësinë e krahut të huaj të punës për ekonominë
e vendit, duke iu përgjigjur kështu qëndrimit të Blosherit kundër emigracionit. Për
një reflektim lidhur me shpresat e shqetësimet e Kishës helvetike, pas këtyre votimeve,
intervistuam ipeshkvin e Luganos, imzot Pier Xhakomo Grampa: Përgjigje:
- Zvicra po jeton një çast kundërvënjeje të fortë ndërmjet së djathtës e së majtës.
Shqetësohemi, sepse vendi po shkon drejt mbylljes së portave, sidomos për të huajtë.
Duhet të mos fitojë frika, shqetësimi për vendin e punës e për praninë e shumnumërt
të të huajve në vend. Në kundërshtim me sa duket, përqindja e të huajve në Zvicer
është shumë e lartë: mbi 20% të popullsisë vendase. Shpresohet që në sistemin tonë
gjysëm demokratik të fitojë bashkëpunimi. Tradita zvicerane kërkon praninë e forcave
kryesore të politikës në qeveri, që kështu të krijohen mundësitë e gjetjes së rrugëzgjidhjeve
më të mira për problemet në vend. Pyetje: - Një temë tjetër, që tërheq vëmendjen
e opinionit publik zviceran, është pa dyshim ajo e qëndrimit ndaj Evropës. Edhe në
këtë drejtim Kisha helvetike ka një pozicion shumë të qartë… Përgjigje: -
Kisha helvetike është një Kishë e hapur për të gjithë, që i mirëkupton e i mirëpret
të huajtë. Por i duhet të ketë parasysh se shumica e vendit nuk ka fituar akoma pjekurinë
e duhur për të hyrë në Evropë. Ndërkaq vijojmë të ecim në rrugën e marrëveshjeve dypalëshe.
Duhet të jemi vigjilentë, të qartë, guximtarë, por edhe të durueshëm, për të shmangur
kundërvëniet që janë gjithnjë në dëm të vendit. Duhet moderim e drejtpeshim. Zvicra
nuk është vend që i duron ekstremizmat.