Kalendari i impenjimeve të ardhshme të Papës:ritet e Kohës së Ardhjes e të Krishtlindjes
dhe vizita në një famulli romake.
(14.10.2007 RV)Ritet e Krishtlindjes dhe të solemnitetit të fillimit të Vitit
të Ri 2008, vizita në një famulli romake, përkujtimi i kardinajve dhe ipeshkvijve
që ndërruan jetë gjatë vitit të kaluar: këto janë disa nga kremtimet liturgjike e
baritore, që Benedikti XVI do t’i kryesojë ndërmjet tetorit e janarit të ardhshëm,
të publikuara nga Zyra e Kremtimeve Liturgjike. Impenjimi i parë që njoftohet
nga kalendari i veprimtarive papnore, tashmë është i njohur: bëhet fjalë për vizitën
e Benediktit XVI në Napoli më 21 tetorin e ardhshëm. Dhjetë ditë më pas, më 5 nëntor,
Papa do të jetë në Elterin e Katedrës, në Bazilikën e Shën Pjetrit, ku do të kremtojë
Meshën për shpirt të kardinajve dhe të ipeshkvijve të vdekur gjatë vitit 2007. Më
e dendur, veprimtaria e Papës gjatë muajit dhjetor, që do të hapet pasditen e parë
të muajit, në orën 17.00, me kremtimin e lutjeve të para mbrëmësore të Kohës së Ardhjes.
Në orën 16.00 të së shtundes së mëpasme, 8 dhjetor, në solemnitetin marian, Benedikti
XVI do t’i bëjë homazhet tradicionale shtatores së Zojës së Papërlyer në Sheshin e
Spanjës në Romë. Të dielën e tretë të Ardhjes, më 16 dhjetor, Papa do të vizitojë
një famulli romake; në orën 9.00 do të kremtojë Meshën Shenjte në Kishën e Zojës Rruzare
e të martirëve Portuensë. Më 25 dhjetor do të nisin kremtimet e mëdha festive:
në mesnatën e Krishtlindjes, Mesha solemne në Bazilikën e Vatikanit; më pas Dita e
Krishtlindjes, me bekimin ‘Urbi et Orbi’, që Papa do ta japë nga lozha qëndrore e
Bazilikës. Më 31 dhjetor, në orën 18.00, gjithnjë në Bazilikën e Shën Pjetrit, Benedikti
XVI do të kryesojë ‘Te Deum’, Lutjet e para të falënderimit drejtuar Zotit për vitin
e kaluar, ndërsa një ditë më pas, më 1 janar 2008, do të kremtojë Meshën e solemnitetit
të Nënës së Zotit, në përkim me Ditën e 41-të Botërore të Paqes. Meshë të tjera,
të kryesuara nga Benedikti XVI, do të jenë ajo e orës 9.00 e së dielës, 6 janar, në
solemnitetin e Dëftimit të Zotit, në Bazilikën e Shën Pjetrit dhe e orës 10.00 të
dielën e mëpasme, festa e Pagëzimit të Krishtit, në Kapelën Sikstine, me ritin tradicional
të pagëzimit të fëmijëve. Së fundi, më 25 janar, Papa do të jetë në Bazilikën e Shën
Palit për kremtimin e Lutjeve mbrëmësore, në festën e Të kthyemit të Apostullit të
Popujve. I ngarkuar edhe kalendari i lumnimeve të miratuara nga Benedikti XVI për
muajt e ardhshëm. Vetëm ndërmjet 20 e 28 tetorit do të ketë pesë lumnime, i fundmi
i të cilëve do të jetë lumnimi i 498-të martirëve të luftës civile spanjolle, që do
të kremtohet në Bazilikën e Shën Pjetrit. Dy janë ritet e lumnimit të parashikuara
për nëntorin në të cilat, ndërmjet tjerësh, do të lartohet në nderimet e elterit,
më 18 të muajit, në Novara të Italisë, Shërbëtori e Hyjit, Antonio Rozmini.E një lumnim
do të kremtohet edhe në dhjetor, në Brazil: është fjala për Shërbëtoren e Zotit, Lindalva
Justo de Oliveira.