У Рыме адбылася падзея - усталяваны каменны армянскі крыж Хачкар ля царквы Святога
Мікалая з Таленціны, у цэнтры італьянскай сталіцы, дзе размешчаны Папскі Армянскі
каледж.
На цырымоніі прысутнічалі
выбітныя армянскія дзеячы з цэлага свету, прадстаўнікі сусветнага Касцёлу, мэрыі
Рыму, дыпламатычныя саноўнікі Арменіі, Расіі, Францыі, Грэцыі. Разбяны традыцыйны
ў старажытным стылі са шматлікімі алегарычнымі знакамі Хачкар узняўся на п'едысталі
побач знака - мемарыяльнай дошкі аб генацыдзе армянскага народа 1915 года, усталяваным
летась. Асвяцілі крыж каталіцкі архімандрыт армян монс.Гофсэп Келікян, нядаўна прызначаны
рэктарам каледжу , і біскуп Армянскай Апостальскай царквы Карекін Бекджіян, які ўзначальвае
армянскую грамаду ў Германіі. Прагучалі гімны Рэспублікі Арменія і Італьянскай Рэспублікі.
У сваім выступленні пасол Арменіі ў Італіі Рубен Шугарян выказаў падзяку ўладам
Рыма і краіны за аказаную дапамогу і выявіў спадзяванне, што Арменія ў гістарычна
кароткі тэрмін увойдзе ў сям'ю народаў Еўрапейскай садружнасці. Прамоўцы гаварылі
і пра неабходнасць прыпамінаць усім і самім армянам аб тым, што нельга забывацца на
генацыд 1915 года дзеля таго, каб такое ніколі і нідзе не паўтаралася.Сын спонсара
праекта Артура Азатряна звярнуўся да ўсіх з прамовай на 4 мовах, а затым хлопчык
таксама на розных мовах накіраваў свой заклік да равеснікаў-армянаў па цэлым свеце
не забывацца на свае карані і заўсёды па-сыноўску і па-хрысціянску любіць матухну-Арменію,
куды б ні накіраваў чалавека лёс у глабалізаваным свеце.