Benedikti XVI : “Uroj që sporti të jetë gjithnjë në shërbim të dinjitetit të njeriut”.
(06.10.2007 RV)“Kur jetohet si duhet, sporti ndihmon fuqimisht për zhvillimin
e njeriut”. Këtë nënvizoi sot Benedikti XVI gjatë audiencës me skuadrën austriake
të skive malore. Si kujtoi me gëzim shtegtimin e tij apostolik në Austri, Papa theksoi
vlerat e vërteta të sportit: “Sporti ndihmon për t’i njohur aftësitë vetjake si talent,
e jetën, si dhuratë të Zotit. Veprimtaria sportive ka rëndësi të dorës së parë për
zhvillimin e gjithanshëm të njeriut, të cilit duhet t’ia respektojë gjithnjë dinjitetin.
Edhe kur bëhet fjalë për sport të niveleve të larta, duhet ruajtur gjithnjë harmonia
ndërmjet trupit e shpirtit, duke pasur shumë kujdes që sporti të mos matet vetëm me
rezultatet”. Më pas Ati i Shenjtë numroi një sërë virtytetsh, që duhet ta karakterizojnë
gjithnjë sportin: guximi, shpirti i flijimit, disiplina shpirtërore e fizike e akoma,
ndjenja e drejtësisë, vetëdija për kufizimet vetjake, respekti i thellë për tjetrin.
E edhe për t’i fituar këto vityrte, duhet stërvitje serioze – tha Papa, e në vijim
vuri theksin mbi kontributin që mund të japin sportistët, posaçërisht si modele për
t’u imituar nga më të rinjtë.