Агульная аўдыенцыя Папы ў сераду 3-га кастрычніка. На ёй быў прысутны арцыбіскуп Марцін
Відавіч, апостальскі нунцы ў Беларусі.
Адбылася яна на Плошчы Сьвятога Пятра. Папа Бэнэдыкт 16-ы ўжо на пастаянна вярнуўся
ў Ватыкан са сваёй летняй рэзыдэнцыі ў Кастэльгандольфо. Прысутнічала на ёй многа
вернікаў і паломнікаў з кожнага кутку сьвету. Як падаюць ватыканскія крыніцы было
іх больш за 20-ць тысяч. У сваёй сёньняшняй катахэзе Папа працягваў
свой цыкл катахэзаў пра Айцоў Царквы. Бэнэдыкт 16-ы зьвярнуў увагу на Кірыла Александрыйскага,
Айца Царквы, Сьвятога, якога ўшаноўвае як Усходняя так і Заходняя Цэрквы Называлі яго ахоўнікам
сапраўднае веры. Быў біскупам Александрыі ў гадах 412-444. У пачатковым пэрыядзе
сваёй паслугі зьвяртаў асаблівую ўвагу на выпраўляньне памылак у сфэры веры і на паглыбляньне
вывучаньня Трынітарнае Дактрыны. Ад 428-га году- гаварыў далей Папа ў часе сёньняшняй
катахэзы- калі біскупам Канстантынопаля выбрана Нэстара, вёў з ім палеміку на тэму
натуры асобы Сына Божага і адносна пытаньня Божага Мацярынства Марыі. Прадметам
спрэчак былі тады марыйныя тытулы: Маці Хрыста ( Хрыстотокос) і Маці Бога ( Тэотокос).
На Эфэскім Саборы 431-га году, ў сувязі з гэтым пытаньнем, дзякуючы сваёй эрудыкцыі,
Сьвяты Кірыл Александрыйскі даў імпульс да ўдакладненьня акрэсьленьняў асабовае еднасьці
Хрыста і тэалагічнае карэктнасьці званьня Тэотокос. Ёсьць аўтарам многіх пісьмаў
і камэнтарыяў да многіх кніг Старога і Новага Запаветаў. Навучаў- сказаў на заканчэньне
Папа- што хрысьціянская вера дае кожнаму магчымасьць сустрэчы з Хрыстом, які дае
жыцьцю новую пэрспэктыву. На заканчэньне аўдыенцыі Сьвяцейшы Айцец прывітаў
усіх вернікаў, асабліва хворых, моладзь ды новыя шлюбныя пары, надзяляючы на ўсіх
сваё Апостальскае Блаславенства.