Koreja e Veriut do të shkatërrojë impiantet bërthamore brenda 31 dhjetorit e lajme
të tjera
(03.10.07 RV)Përfundoi takimi i nivelit të lartë ndërmjet dy Koreve. Presidenti
koreanojugor, Ruh Mu Hjun u shpreh i kënaqur nga bisedimet me kreun e Koresë së Veriut,
Kim Jong Il. Nga bisedimet e Pekinit mbi programin bërthamor koreanoverior vjen lajmi
i mirë i impenjimit të Piong-jangut për të shkatërruar impiantet atomike brenda 31
dhjetorit. Është një hap vendimtar e historik për të ulur tensionin në zonë.
Ambasadori
polak në Irak ka mbetur i plagosur gjatë një shpërthimi në Bagdad. Kryeministri
i Polonisë Kaçinski ka bërë të ditur se gjithsesi, Varshava nuk do të tërheqë trupat
nga koalicioni që vepron në vend. Edhe kësaj radhe, rojet që shoqëronin karvanin,
ishin të kompanisë Blekuotër, të përfolur muajin e kaluar për një sulm kundër civilëve
irakianë. Sot, hetimet kanë nxjerrë në dritë, se në atë ngjarje mbetën të vrarë 17
civilë e jo 10, siç u deklarua fillimisht, dhe u plagosën 24 të tjerë. Rojet e kompanisë
Blekuoter, të ashtuquajturit “kontraktors”, qëlluan mbi turmën në sheshin Nisur të
Bagdadit pas shpërthimit të një autobombe.
Akoma tjetër atentat në
Pakistan. Në veriperëndim të vendit 14 persona janë vrarë e 5 të tjerë janë plagosur
gjatë shpërthimit të një bombe. Ndërkaq, ish-kryeministrja Benazir Buto, duke folur
me gazetarët në Londër, deklaroi se bisedimet me presidentin Musharraf për ndarjen
e pushtetit janë krejtësisht të bllokuara. Gjithashtu nuk është i vërtetë lajmi se
akuzat për korrupsion kundër saj, të cilat e patën shtyrë në azil vullnetar më 1999,
janë arkivuar.