Benedikti XVI në audiencën e përgjithme: ipeshkvijtë duhet ta mbrojnë pasurinë e fesë
e të traditës nga interpretimet e gabuara, siç bëri Shën Çirili i Aleksandrisë.
(03.10.2007 RV)“Besnikëria ndaj
traditës është bazë për ruajtjen e fesë, që na e lanë trashëgim Apostujt”. Këtë na
mëson, me jetën e veprimtarinë e tij baritore, Çirili i Aleksandrisë, njëri nga Etërit
e mëdhenj të Kishës ndërmjet shekullit IV e V. Pikërisht falë mësimeve të tij të qarta,
Çirili i Aleksandrisë fitoi betejën kundër herezisë më të rrezikshme të kohës së tij,
asaj të Nestorit, që mohonte natyrën hyjnore të Krishtit. Benedikti XVI, që sot u
rikthye nga Kastel Gandolfo në Vatikan, e përqëndroi pikërisht tek figura e Shën Çirilit
katekizmin e audiencës së sotme të përgjithshme, mbajtur në Sheshin e Shën Pjetrit,
në praninë e dhjetra-mijëra besimtarëve. Shën Çirili – shpjegoi Benedikti XVI
- garant i vazhdimësisë apostolike e doktrinore, që Papa Leoni XIII e shpalli në vitin
1882 ‘Doktor të Kishës’, qe një nga mbrojtësit e mëdhenj të fesë, i aftë të shkrinte
në një, qartësinë e mendimit, qëndrimin koherent ndaj traditës dhe forcën e polemistit
përballë kundërshtarëve të cilët, në shekujt e parë të krishterimit, u propozonin
besimtarëve interpretime thellësisht të gabuara. Këtu qëndron edhe madhështia e Shën
Çirilit, për jetën dhe veprimtarinë e të cilit foli sot Benedikti XVI përballë mijëra
njerëzve, i pritur me entuziazëm të madh në Sheshin e Shën Pjetrit, nën rrezet e një
dielli që më shumë të kujtonte stinën e verës, sesa fillimin e vjeshtës. “Në
lindjen greke – tha Papa, duke shpjeguar madhështinë e Shenjtit – Çirili u
njoh si rojtar i fesë së vërtetë e madje, edhe si ‘vula e Etërve’. Kjo shprehje e
lashtë sintetizon një karakteristikë themelore të Ipeshkvit të Aleksandrisë, i cili
mbështetej gjithnjë tek autorët kishtarë pararendës (ndërmjet të cilëve, posaçërisht
tek Shën Atanasi), për të treguar kështu se teologjia e tij ishte vazhdim i asaj të
traditës”. Ipeshkvi aleksandrin hyri në histori për ndeshjen me një ipeshkëv
tjetër, Nestorin e Kostandinopojës, që nisi ta kremtonte Krishtin si njeri, duke mohuar
hyjninë e Zotit e, prej këndej, edhe titullin e Marisë si “Nënë e Zotit”, që ishte
përhapur kudo në botën e krishterë. Shën Çirili reagoi menjëherë, duke dërguar disa
letra. E dyta hyri në histori për shumë arsye e, sidomos, për përkufizimin e shkëlqyer
teologjik, që hedh poshtë qëndrimin e Nestorit lidhur me veçimin e dy natyrave të
Krishtit. Ky përkufizim, që Benedikti XVI e citoi, u pranua, më pas, njëzëri nga Koncili
i Kalçedonisë, në vitin 451: “Pohojmë kështu se janë të ndryshme natyrat, që
u bashkuan në një unitet të vërtetë, por nga dy natyrat, rezulton një Krisht, një
Bir i vetëm, jo sepse për shkak të unitetit u zhduk ndryshimi i natyrave, por sepse
natyra hyjnore e ajo njerëzore, të shkrira në një bashkim të pashqyrtueshëm e të pashprehshëm,
përftuan për ne një Zot, një Krisht, një Bir të vetëm”. Përveç kësaj, në letrën
e dytë drejtuar Nestorit, Shën Çirili skalit me mjeshtri të rrallë figurën e ipeshkvit
dhe pergjegjësitë që ka në mbrojtjen, transmetimin dhe interpretimin e mësimeve të
fesë: “Në letrën e dytë që Çirili i dërgoi, në shkurt të vitit 430, pohohen
qartë detyrat e barinjve për mbrojtjen e fesë së popullit të Zotit. Kriteri i tij,
me vlerë edhe për sot, ishte: feja e popullit të Zotit është shprehje e traditës
dhe garanci për doktrinën e shëndoshë”. Duke u nisur nga kjo thellësi dhe
freski e jetës së krishterë, që Shën Çirili i Aleksandrisë e dëshmoi gjatë gjithë
jetës, Papa arriti në përfundimin: “Feja e krishterë është sidomos takim me
Jezusin, Vetje që i hap horizont të ri jetës. E Shën Çirili qe gjithnjë dëshmitar
i palodhshëm i Jezu Krishtit, Fjalës së Hyjit të mishëruar, duke ia nënvizuar posaçërisht
unitetin. Ky pohim, përveç kuptimit të vet doktrinor, tregon se feja në Jezusin, Logos
i lindur nga Ati, është rrënjosur thellë edhe në histori sepse, siç pohon Shën Çirili,
po ky Jezus erdhi në kohë, duke lindur nga Maria, nga Theotòkos apo Nëna e Zotit,
e do të jetë, sipas premtimit, gjithnjë me ne”. Gjatë përshëndetjeve në gjuhë
të ndryshme, duke iu drejtuar shtegtarëve polakë, Papa kujtoi festën e madhe që do
të kremtojë nesër Kisha katolike: ”Nesër në liturgji kujtohet Shën Françesku
i Asizit i cili, duke i përngjarë Krishtit, hoqi dorë nga pasuritë tokësore. Na mësoi,
kështu, se duhet të jemi të thjeshtë, të përvujtë e të pastër, që kur ta lemë këtë
botë, ta marrim shpërblimin për dashuri. Të mësojmë nga Shën Françesku për ta jetuar
fjalë për fjalë Ungjillin”.