KUVENDI I SHQIPERISE NDERON ME 1 MINUT HESHTJE FIGURËN E AT ZEF PLLUMIT OFM
27 Shtator 2007/ATSH-Anila Struga/- Kuvendi nderoi sot (e enjte) me një minutë
heshtje figurën e At Zef Pëllumbit, i cili u nda nga jeta mbrëmjen e së martës në
spitalin Romës, ku ndodhej i shtruar prej disa javësh. Gjatë 60 minutëshit
të parë të diskutimeve të lira në Kuvend, deputetët vlerësuan figurën e At Zef Pllumit
si një ikonë dhe kolos të kulturës kombëtare. Kryetarja e Kuvendit, Jozefina
Topalli, u shpreh se "figura e At Zef Pllumit kodifikon identitetin e tij kulturor
si identitet thellësisht europian". Ndërsa deputeti i PD-së, Prec Zogaj,
tha se "vepra e tij 'Rrno për me tregue', është një vepër e shkruar në liri, ishte
një sagë e vuajtjeve të tij dhe vjen si një doktrinë thirrjesh për lirinë". Deputeti
i PD-së, i propozoi ministrit të Turizmit, Kulturës, Rinisë dhe Sporteve që çmimi
i memoralistikës të mbajë emrin e At Zef Pllumit dhe po ashtu emri i tij të përjetësohet
në emërtimin e shkollave. "At Zef Pëllumbi është një kolos dhe ikonë e kulturës
sonë kombëtare", u shpreh në fjalën e mbajtur deputeti Bujar Leskaj, ish-ministër
i MTKRS-së. Deputeti Leskaj tha se "për At Zef Pllumin do të kenë nevojë të gjithë
brezat".