Benedikti XVI përshëndetet me bashkësitë e Kastel Gandolfos. Më 3 tetor do të kthehet
në Vatikan.
(28.09.2007 RV)Benedikti XVI u
takua sot me bashkësitë e ndryshme të Kastel Gandolfos për t’i përshëndetur para
rikthimit në Vatikan, të mërkurën e ardhshme, më 3 tetor, kur do të mbajë edhe audiencën
e përgjithshme. Papa arriti në selinë e tij verore të Kastel Gandolfos mbrëmjen
e 27 korrikut të kaluar, pasi përfundoi pushimet verore në Lorencago të Kadores, në
bjeshkët e Dolomiteve. Ati i Shenjtë u shprehu mirënjohjen e tij të gjithë atyre që
e ndihmuan, në mënyra të ndryshme, të çlodhet e të rifitojë energjitë për vijimin
e veprimtarisë së tij aq të rëndësishme në drejtimin e Kishës universale. Në mënyrë
të posaçme falënderoi ipeshkvin e Albanos, imzot Marçelo Semeraron, mbarë dioqezën
si dhe bashkësitë e ndryshme rregulltare që jetojnë e punojnë në qytezën laciale: “Secilit
nga ju dëshiroj t’i them: Papa shpreson shumë në mbështetjen tuaj shpirtërore dhe
ju shoqëron me lutje, që të mund t’i përgjigjeni gjithnjë me bujari thirrjes në rrugën
e përsosjes ungjillore, për t’i shërbyer Zotit e vëllezërve”. Më pas Papa falënderoi
edhe administratën komunale të Kastel Gandolfos: “Të gjithë e njohin stilin
e mikpritjes së përzemërt, që e dallon qytetin tuaj dhe banorët e tij, të cilët nuk
mikpresin vetëm Papën, por edhe shtegtarët e panumërt që vijnë ta vizitojnë, në mënyrë
të veçantë të dielave, për takimin e zakonshëm të Engjëllit të Tënzot”. Mirënjohje
nga ana e Papës edhe për personelin mjekësor, për specialistët e ndryshëm të Shërbimeve
të Governatoratit, për funksionarët dhe përfaqësuesit e Forcave italiane të Rendit,
për kujdesin me të cilin mbështetën Forcat e xhandarmërisë së Vatikanit dhe ato të
Rojes Zvicerane Papnore. Në përfundim Papa ia besoi të gjithë mbrojtjes amtare të
Zojës së Bekuar, ndërsa i bekoi ata e të gjithë të dashurit e tyre.