Fjalët e Benediktit XVI mbi logjikën e fitimit dhe të shpërndarjes së drejtë të të
mirave materiale: reflektim i atit jezuit Xhankarlo Gola dhe i pedagogut Leonardo
Beketi.
(25.09.2007 RV)Vijon të ndjehet
fort jehona e fjalëve të Benediktit XVI, shqiptuar të dielën e kaluar në sheshin para
katedrales së Veletrit, ku kishte shkuar për vizitë baritore. Të ndjekim një fragment:
“Logjika e fitimit, nëse mbizotëron, thellon shpërpjestimet ndërmjet të varfërve dhe
të pasurve dhe shfrytëzimin shkatërrimtar të planetit. Ndërsa, kur mbizotëron logjika
e ndarjes së drejtë të të mirave materiale dhe e solidaritetit, mund të ndërrohet
udha e të orientohemi drejt zhvillimit të barabartë, për të mirën e përbashkët të
të gjithëve. Në fund të fundit, duhet të zgjedhim ndërmjet egoizmit e dashurisë, ndërmjet
drejtësisë e pandershmërisë e, si përfundim, ndërmjet Zotit e Djallit”. Si ta
interpretojmë ftesën e Atit të Shenjtë për zotërimin e logjikës të ndarjes së drejtë
të të mirave materiale mbi atë të fitimit? Ia drejtuam këtë pyetje atë Xhankarlo Golës,
jezuit, profesor i lëndës biblike në Institutin e lartë të shkencave fetare të dioqezës
së Torinos: Përgjigje: - Ka shumë rëndësi ta kuptosh mirë vështrimin e fjalës
‘mbizotëron’, që nuk ka thjeshtë kuptim sasior. Prandaj mund të themi se logjika e
fitimit mund të ndiqet, por me kusht që në vështrimin sasior, të mbizotërojë logjika
e ndarjes së drejtë të të mirave materiale. Gjithsesi, për mendimin tim, fjala duhet
interpretuar në kuptim cilësor; prej këndej, në se kur përdorim fjalën ‘fitim’ kemi
parasysh zhvillimin ekonomik, pasurinë, kjo ka kuptim vetëm në se përmes saj realizojmë
solidaritetin, realizojmë ndarjen e drejtë e të ndershme të të mirave materiale. Por
në se me këtë fjalë kuptojmë realizimin e vetvetes, atëherë mbizotërimi bëhet rrugë
e vdekjes, të çon në adhurimin e idhullit ‘mamonë”, gjë që, me të drejtë, e ve në
dukje edhe Papa. Pyetje: - Sa është e pranishme në kulturën tonë katolike
logjika e solidaritetit dhe e ndarjes së drejtë të të mirave materiale, për mbizotërimin
e së cilës fton Ati i Shenjtë? Përgjigje: - Besoj se në realitetin katolik
e më gjërë, në kishat e krishtera, ky është realitet i gjallë. Por nuk ka dyshim se
ekzistojnë edhe shumë kundërshtime e shumë interpretime të Ungjillit, që kanë për
qëllim të mbrojnë qëndrime vetjake, privilegje vetjake. Pyetje: - Ç’ vlerë
ka koncepti i pasurisë në Besëlidhjen e Re? Përgjigje: - Jezusi në Ungjillin
sipas Lukës flet për kontrastin ndërmjet fjalëve ‘pak’ e ‘shumë’, për ‘mamonën e padrejtë’,
që i kundërvihet së drejtës, për ‘gjënë që i përket tjetrit’ e për atë që është ‘juaja’.
Por ç’do të thotë ‘pak’, ‘mamonë’ e ‘padrejtë’, ‘gjëja e tjetrit’? Janë pikërisht
të mirat e kësaj bote, është pasuria. Ne duhet të kërkojmë ‘shumë’, duhet të kërkojmë
‘gjënë e vërtetë’, atë që është vërtetë jona, të kërkojmë atë që na bën bij e vëllezër,
që na bën të denjë për ndërtimin e Mbretërisë së Hyjit: kjo është çështja! Mënyra
për ta realizuar këtë, është ndarja e drejtë e të mirave materiale, është solidariteti”.
Mbi vlerën e fjalëve
të Benediktit XVI lidhur me aktualitetin shoqëror dhe ekonomik, intervistuam Leonardo
Beketin, pedagog i ekonomisë politike pranë Universitetit të Tor Vergatës në Romë
dhe drejtor i Bashkësisë së jetës së krishterë, me frymëzim injacjan: Përgjigje:
- Besoj se ka shumë rëndësi, sepse problemi i sotëm është i qartë: ka rrezik që
fitimi të bëhet vlerë e të radhitet në krye të listës së vlerave. E, për fat të keq,
kur aksionisti vë në krye të listës krijimin e vlerës, mund të lindin shumë konflikte,
duke nisur nga konflikti ndërmjet aksionistëve e klientëve të një banke, për shembull.
Mund të lindin edhe konflikte të tjera, si ai ndërmjet aksionistëve e punëtorëve:
një ndërmarrje, për të rritur rendimentin e aksioneve, keqëson kushtet e punës dhe
nis pushimet e nëpunësve. Prandaj duhet theksuar se të krijosh vlera ekonomike është
themelore, por gjithçka duhet shkallëzuar drejtë, duke e radhitur çdo gjë në vendin
që i takon. Pyetje: - Lidhur me këtë, kujtojmë se Papa ka thënë që fitimi
është i ligjshëm e, në masë të drejtë, edhe i nevojshëm për zhvillimin ekonomik. Cila
është, sipas jush, masa e drejtë? Përgjigje: - Është të pajtosh krijimin
e vlerës ekonomike me atë të vlerës shoqërore. Duhet të ndërtojmë një botë në të cilën,
krijimi i vlerave ekonomike nuk i kundërvihet ambientit, duke i shkaktuar dëme të
rënda. E duhet theksuar se një ekonomi e tërë ecën në këtë drejtim! Mendoj për pionierët,
mikrokreditet, bankat etike, drejtësinë shoqërore, por edhe për reagimin e sistemit
të sipërmarrjeve tradicionale, për përgjegjësinë e tyre.