Bush shpall sanksione kundër regjimit të Mianmarit
(25.09.2007 RV)Vazhdon protesta e murgjërve budistë dhe e mijëra personave
në Mianmar, ku xhunta ushtarake ka rreshtuar policët në sheshin e Jangonit. Komisioni
Evropian është shprehur i shqetësuar për gjendjen dhe ka theksuar të drejtën e protestuesve
për të manifestuar kundër regjimit. Në fjalimin e tij në Asamblenë e Përgjithshme
të OKB-së, presidenti amerikan Xhorxh Bush shpalli sanksione kundër qeverisë së Jangonit
dhe financuesve të saj. Ai kërkoi gjithashtu që Kombet e Bashkuara të mbështesin përpjekjet
për arritjen e demokracisë në Mianmar. Edhe pikat e tjera të fjalimit të presidentit
amerikan u pritën me interes nga pjesëmarrësit. Bush u tregua i gatshëm për reformimin
e OKB-së e për hyrjen e Japonisë dhe të fuqive të tjera në zhvillim, si anëtare të
përhershme në Këshillin e Sigurimit. Përsa i përket Iranit, presidenti amerikan theksoi
se vendi bën pjesë në listën e regjimeve brutale, që u mohojnë shtetasve të tyre të
drejtat themelore. Presidenti i Iranit, Ahmadinexhad dhe shpura e tij ishin të pranishëm
gjatë fjalimit, por nuk e duartrokitën. Duke iu referuar gjendjes së keqe shëndetësore
të Fidel Kastros, Bush deklaroi edhe se populli kuban është gati për fundin e diktaturës.
Me optimizëm për gjendjen në Lindjen e Mesme, ku i sheh palestinezët dhe izraelitët
të ndarë paqësisht në dy shtete, Bush theksoi se çdo vend e ka për detyrë të ndihmojë
edhe Irakun, Afganistanin dhe Libanin.