(23.09.2007 RV)Papa Benedikti XVI ia kushtoi katekizmin e audiencës së përgjithshme
mbajtur të mërkurën paradite, në Sheshin e Shën Pjetrit në Vatikan, shën Gjon Gojartit,
i cili jetoi në shekullin e katërt pas Krishtit dhe qe njëri prej predikatarëve më
të mëdhenj të Kishës së lashtë. Sivjet përkujtohet 1600 vjetori i vdekjes së tij. Mosha
e fëmijërisë është ajo në të cilën mund të jepen “udhëzimet e mëdha e orientimet e
drejta për jetën”. Martesa, kur mund të mbështetet mbi çiftin e formuar mirë me vlera
të krishtëra, ia ndalon rrugën divorcit. E jeta shoqërore mund të jetë po aq pozitive
nëse bazohet mbi parimin e “mos interesimit vetem për veten tonë”. Mësimet e lashta
të para 1600 vjetëve të Shën Gjon Gojartit jehuan sërish të mërkurën në Sheshin e
Shën Pjetrit, në fjalët e Benediktit të XVI të cilat ua propozoi mijëra e mijëra personave
të pranishëm, që gjithnjë mbushin sheshin.
Të premten, Papa Benedikti
XVI priti në audiencë në Kastel Gandolfo, krerët e Internacionales Demokratike të
Qendrës dhe Demokratike të Krishterë, ndërmjet të cilëve edhe kryeministrin e Shqipërisë,
Sali Berisha dhe kryetaren e parlamentit, Jozefina Topalli. Të krishterët të jenë
“kripa” e veprimtarisë politike në të gjithë botën, me vlerat dhe idealet e tyre në
mbrojtje të jetës e të familjes dhe më gjerë, në mbrojtje të të drejtave themelore
të çdo njeriu. Kështu u tha atyre Ati i Shenjtë, i cili i nxiti edhe për një luftë
pa kompromis kundër terrorizmit dhe fondamentalizmit fetar që ai ushqen, duke përdorur
si armë solidaritetin dhe lirinë e kultit.