У пятніцу 21-га верасьня Папа Бэнэдыкт 16 назначыў монс. Тадэвуша Кандрусевіча Менска-
Магілёўскім Арцыбіскупам-Мітрапалітам, адклікаючы яго адначасна з пасады арцыбіскупа-мітрапалітва
маскоўскае архідыяцэзыі “Божае Маці”. Ён зойме месца 93-х гадовага кардынала Казіміра
Сьвёнтка, які быў летась накіраваны на пэнсію. Тадэвуш Кандрусевіч нарадзіўся ў
1946-м годзе ў Адэльску на Гарадзеншчыне. Скончыў Ленінградзкі палітэхнічны Інстытут
і некалькі гадоў прарабіў інжынерам у Вільні. 31-га траўня 1981-га году па сканчэньні
Ковенскай Духоўнай Сэмінарыі быў рукапаложаны ў сьвятары. Абараніў доктарскую дысэртацыю
“Самасьвядомасьць Царквы паводле дакумантаў Другога Ватыканскага Сабору”. З 1988-га
году жыў у Беларусі. 10-га траўня 1989-га году быў прызначаны Апостальскім Пасадам
біскупам для Менскай дыяцэзыіі. У красавіку 1991-га году прызначаны Апостальскім
адміністратарам для католікаў лацінскага абраду паўночнай Эўрапэйскай часткі Расіі.
У сакавіку 1999-га году выбраны Старшынём Канфэрэнцыі Каталіцкіх Біскупаў Расеі а
ў лютым 2002-га году прызначаны Папам Янам Паўлам ІІ мітрапалітам новаствораных рымска-каталіцкіх
япархій Расеі. Тадэвуш Кандрусевіч валодае беларускай, польскай, расейскай, літоўскай,
ангельскай і італьянскай мовамі.
На месца мітрапаліта Кандрусевіча ў Маскву
Папа Бэнэдыкт 16 назначыў монс. Паўло Пэццы, італьянца. Нарадзіўся ён 8-га жніўня
1960-га году ў Руссі ў раёне Эмілія Романія. У гадах 1985-90 вывучаў філазофію ды
тэалогію на Папскім Унівэрсытэце Сьвятога Тамаша. Быў рукапаложаны ў сьвятары 22-га
сьнежня 1990-га году. Працаваў у розных касьцельных установах, між іншым, быў дырэктарам
каталіцкага часопісу а ў гадах 1993-98 быў дэканам дэяцэзыі Перамяненьня Гасподняга
ў Новасыбірску; дацэнтам Вышэйшай Духоўнай Сэмінарыі “Марыя Каралева Апосталаў” у
Сан Петрабургу ды ад 2006-га году ёсьць рэктарам гэтае сэмінарыі. Валодае рускай,
ангельскай, гішпанскай ды французкай мовамі.