Ipeshkvijtë e Beninit tek Papa në vizitë ad Limina
(17.09.2007 RV)Filluan sot audiencat e Papës me ipeshkvijtë e Beninit, të
cilët gjenden në Vatikan për vizitën e tyre Ad Limina Apostolorum, e cila bëhet çdo
pesë vjet. Ndër ipeshkvijtë e parë që Benedikti XVI priti sot në takim në Kastelgandolfo
është edhe imzot Antuan Ganjé, ipeshkëv i Dassa-Zoumès e president i Konferencës Ipeshkvnore
të Beninit. Clirimi i politikës nga korrupsioni tejet i përhapur në vend është
ndër sfidat kryesore shoqërore për Kishën e Beninit, tha ipeshkvi Ganjé në një intervistë
dhënë Radio Vatikanit. Sfida tjetër është kundërshtimi i përhapjes së sekteve fetare
në rritje, siç dëshmojnë shifrat. Vetëm në shtetin e varfër afrikan të Beninit sektet
janë të pranishme me 650 bashkësi të ndryshme. Kujtojmë se Benini sot po
kalon një krizë të thellë ekonomike, shkaktuar edhe nga procesi i globalizimit e nga
rënia e tregtisë rajonale, që ka anulluar një pjesë të mirë të të ardhurave, deri
në 5 % në këto vitet e fundit. Benini përbëhet prej rreth 40 grupesh etnike të ndryshme.
65 % e popullsisë i përket fesë tradicionale animiste, 10 % janë myslimanë e 23% katolikë,
që ndahen në 10 dioqeza. Ndër prioritetet baritore të Kishës në Benin është pjesëmarrja
më e madhe e laikëve, sidomos për formimin e familjeve të vërteta kristiane, që të
bëhen të afta për t’i nderuar e mbajtur vlerat sakramentale të martesës, në opozitë
me poligaminë, që është trashëguar nga tradita e lashtë, ende e rrënjosur në shoqërinë
afrikane. Pastaj promovimi i thirrjeve meshtarake e regulltare, formimi i të rinjve
si dhe dialogu ndërfetar, në një kontekst ku të krishterët janë pakicë. Në Benin Kisha
katolike është e varfër dhe me pak infrastruktura, synon në mënyrë të veçantë zhvillimin
e mediave për ungjillëzim, posaçërisht përmes Radios, duke pasur parasysh se 69 %
e popullsisë është analfabete.